.png)
Qeveria angleze po planifikon një ligj të ri në Angli për të ndaluar këdo nën moshën 16 vjeç të blejë pije energjike si Red Bull, Monster dhe Prime nga dyqanet, restorantet, kafenetë, makinat shitëse dhe në internet.
Mendohet se deri në një të tretën e fëmijëve në Mbretërinë e Bashkuar konsumojnë këto lloje pijesh çdo javë, pavarësisht se shumica e supermarketeve kanë futur tashmë një ndalim vullnetar.
Disa pije të njohura përmbajnë më shumë kafeinë se dy filxhanë kafe.
Sekretari i Shëndetësisë dhe Kujdesit Social, Ëes Streeting, tha se po vepronte sipas shqetësimeve të prindërve dhe mësuesve dhe po e trajtonte këtë cështje për të mbrojtur shëndetin e të rinjve.
Një konsultim do të zgjasë për 12 javë për të mbledhur prova nga ekspertët e shëndetit dhe arsimit, si dhe nga publiku, shitësit me pakicë dhe prodhuesit.
Shumë kafeinë mund të shkaktojë një rrahje të shpejtë të zemrës, ritme jonormale të zemrës dhe gjithashtu kriza.
Edhe pse e rrallë, ka pasur disa vdekje të lidhura me kafeinën e tepërt.
Sipas rregullave aktuale të etiketimit, çdo pije me mbi 150 mg kafeinë për litër kërkon një etiketë paralajmëruese që thotë: “Përmbajtje e lartë kafeine. Nuk rekomandohet për fëmijët ose gratë shtatzëna ose që ushqejnë me gji.”
Të rinjtë kanë trupa më të vegjël dhe truri i tyre është ende në zhvillim e sipër, gjë që mund t’i bëjë ata më të ndjeshëm ndaj kafeinës, thonë ekspertët.
“Duke i ndaluar dyqanet t’ua shesin këto pije fëmijëve, ne po ndihmojmë në ndërtimin e themeleve për breza më të shëndetshëm dhe më të lumtur që do të vijnë”, tha Streeting.
Prof. Steve Turner, president i Kolegjit Mbretëror të Pediatrisë dhe Shëndetit të Fëmijëve, tha se një ndalim ishte “hapi tjetër logjik” në bërjen e dietave të fëmijëve më të shëndetshme.
Irlanda e Veriut, Skocia dhe Uellsi po shqyrtojnë gjithashtu një ndalim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
