Gazeta Si – Modeli i fletës së votimit për zgjedhjet parlamentare të 11 majit do të jetë në përmasa gjigande, sipas asaj që u miratua në mbledhjen e Komisionit Qendror të Zgjedhjeve këtë të martë.
11 subjekte elektorale do jenë të renditura në fletën e votimit dhe secili prej tyre do ketë 186 kandidatë sipas qarqeve.
Në Qarkun e Tiranës, fleta e votimit pritet të jetë gjigande nga përmasat, pasi në të do të renditen jo pak, por 539 kandidatë në të dyja listat, atë të mbyllur dhe të hapur.
Fleta e votimit, në krye të saj ka logon e partisë kryesore në koalicione, më pas emrin e kreut të koalicionit, si dhe të gjitha partive që përbëjnë koalicionin. Më pas janë të renditur të gjitha kandidatët e listës së hapur.
Për të votuar, qytetarët do të kenë tre mundësi. Mundësia e parë është që të vendoset një X te koalicioni dhe kandidati pjesë e koalicionit.
Mundësia e dytë, të votohet vetëm kandidati dhe në këtë mënyrë vota shkon automatikisht edhe për koalicionin dhe e treta të votohet vetëm koalicioni. Në këtë rast digjet vota për kandidatët e listës së hapur.
Në rast se dikush do të votojë një koalicion dhe do të zgjidhte një kandidat jashtë këtij koalicioni, vota do të jetë e pavlefshme.
Një ditë më parë, KQZ hodhi shortin për renditjen e partive politike në fletën e votimit ku goglat i rezervuan Partisë Demokratike- Aleanca për Shqipërinë Madhështore renditjen e para, ndërsa socialistëve shorti u dha numrin 5.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
