Nga Gazeta ‘Si’-“Unë e nxora nga koma, Lali Eri e bëri të vrapojë”, ishin fjalët e kryeministrit Edi Rama për Bashkinë e Tiranës gjatë takimit me punonjësit e saj.
Rama u shpreh sot se asnjë buf dhe asnjë specie tjetër e kënetës, duke iu referuar opozitës, nuk e mbulon dot me shoshën e blozës dhe të llumit, sipas tij, diellin e transformimit kolosal historik të Tiranës.
Në një takim me punonjësit e bashkisë së Tiranës, Rama solli në vëmendje transformimin e Tiranës që ka nisur që me drejtimin e tij në krye të bashkisë, për të vijuar me punën që është bërë gjatë drejtimit të Erion Veliajt.
“Pa mua që e nxora nga koma dhe rrënojat, e pastrova nga llumi dhe e ngrita në këmbë me mbështetjen e pakursyer të popullit të Tiranës dhe të PS-së, të socialistëve dhe progresistëve kryeqytetas dhe pa lali Erin që e bëri të vrapojë dhe të kthehet në një destinacion turistik gjithëvjetor me mbështetjen e pakursyer të të gjithëve ne, ky qytet nuk do të ishte dot kurrë vendi ku sot shëtisin si europianë që të gjithë, opozitarë, prokurorë, gjykatës, analistë, gjithologë, gazetarë e qytetarë”, tha Rama.
Rama theksoi se sot qytetarët e Tiranës shkojnë e vijnë në punën e tyre duke i çuar fëmijët në çerdhe, kopshte dhe shkolla që sipas tij nuk i lënë asnjë gjë mangët shkollave të BE-së.
“I çojnë të afërmit në një spital që nuk i lë gjë mangët spitaleve të BE-së. Dhe duke shëtitur nëpër parqe bashkë me prindërit e tyre pensionistë dhe duke dalë edhe për vrap nga liqeni në një park si parqet në Europë dhe jo si ai parku ku u zhvillua lufta e fundit civile e Tiranës mes disa specieve të kënetës opozitare të armatosur me pistoleta dhe policëve bashkiakë për t’i hapur rrugë një këndi lojërash”, shtoi Rama
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
