Gazeta Si – Një gjykatë turke ka dënuar pronarin dhe arkitektin e hotelit Grand Isias në Adiyaman, në Anadollin juglindor, me mbi 18 vjet burg, i cili u shemb gjatë tërmetit të 6 shkurtit 2023, duke shkaktuar vdekjen e 72 personave.
Pronari i hotelit Ahmet Bozkurt dhe arkitekti Erdem Yilmaz u dënuan të dy me 18 vjet e 5 muaj burg për “shkaktim të vdekjes dhe plagosjes së më shumë se një personi nga pakujdesia e vetëdijshme”, raporton TV shtetëror Trt.
Me mbi 17 vjet burg u dënua edhe djali i pronarit, mbi 16 vjet burg inxhinieri, ndërsa dy inxhinierë të tjerë u dënuan mbi 8 vjet.
Ndër 72 viktimat e hotelit Grand Isias në Adiyaman, 35 ishin shtetas qipriotë turq, kryesisht adoleshentë që mbërritën në Turqi për të marrë pjesë në një turne volejbolli.
Tërmeti i shkurtit 2023, me magnitudë 7.8 ballë, goditi një rajon të gjerë në Anadollin juglindor, ku vdiqën mbi 53 mijë njerëz, si dhe një pjesë të Sirisë veriperëndimore, ku viktimat e konfirmuara ishin më shumë se 6 mijë.
Në javët pas tërmetit, mbi 260 persona të përfshirë në ndërtimin e ndërtesave të shembura u arrestuan në Turqi.
Mes tyre, disa u kapën në përpjekje për të ikur jashtë vendit, si sipërmarrësi përgjegjës për ndërtimin e një pallati në Adana, shembja e të cilit shkaktoi vdekjen e 96 personave, i cili në shtator u dënua me 865 vjet burg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
