.png)
Disa nga të emëruarit për kabinetin dhe administratën e Presidentit të zgjedhur Donald Trump u bënë objekt sulmesh të dhunshme të martën në mbrëmje dhe të mërkurën në mëngjes, tha zëdhënësja e Trump, Karoline Leavitt.
“Këto sulme përfshinin kërcënime me bomba dhe incidente të ‘swatting’-ut,” deklaroi Leavitt.
“Forcat e rendit dhe autoritetet vepruan me shpejtësi për të garantuar sigurinë e të gjithë të shënjestruarve. Presidenti Trump dhe ekipi i Tranzicionit janë mirënjohës për ndërhyrjen e tyre të shpejtë.”
Elise Stefanik, e zgjedhur për ambasadore të SHBA-së në OKB dhe përfaqësuese republikane e New York-ut, u shënjestrua gjithashtu. Zyra e saj njoftoi përmes një postimi në X (ish-Twitter):
“Këtë mëngjes, Kongresistja Elise Stefanik, bashkëshorti dhe djali i tyre trevjeçar po ktheheshin në shtëpi në Saratoga County nga Uashingtoni për Ditën e Falënderimeve kur u informuan për një kërcënim me bombë ndaj shtëpisë së tyre. Forcat e rendit të Shtetit të New York-ut, të qarkut dhe Policia e Kapitolit reaguan menjëherë me profesionalizëm të lartë,” thuhej në deklaratë, duke falënderuar autoritetet për ndërhyrjen e tyre.
FBI-ja deklaroi se po i merr kërcënimet shumë seriozisht:
“Jemi në dijeni të kërcënimeve të shumta me bomba dhe rasteve të ‘swatting’-ut ndaj të emëruarve të administratës së ardhshme dhe po bashkëpunojmë ngushtë me partnerët tanë të rendit. I trajtojmë të gjitha kërcënimet me seriozitet maksimal dhe inkurajojmë qytetarët që të raportojnë çdo veprim të dyshimtë menjëherë tek autoritetet,” thuhej në deklaratën e FBI-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
