.png)
Gazeta Si – Koreja e Veriut ka ratifikuar një pakt të madh të mbrojtjes reciproke me Rusinë, i cili parashikon ndihmë të menjëhershme të ndërsjellë ushtarake nëse ndonjë nga dy vendet sulmohet.
Rusia e kishte ratifikuar tashmë traktatin javën e kaluar. Të hënën, diktatori i Koresë së Veriut, Kim Jong Un nënshkroi një dekret për ratifikimin e paktit.
Siç raportohet nga agjencia lokale e lajmeve “KCNA”, pakti do të hyjë në fuqi kur të dy shtetet të kenë shkëmbyer dokumentet e nënshkruara.
Përveç ndihmës ushtarake, pakti parashikon që Rusia dhe Koreja e Veriut të bashkëpunojnë në sektorë strategjikë, si ekonomia dhe tregtia, hapësira, furnizimi me ushqim dhe energjia atomike për përdorime paqësore, raporton “Euronews”.
Ratifikimi i paktit nga Koreja e Veriut vjen pas disa javësh kritikash të forta ndërkombëtare, pasi vendi dërgoi mijëra trupa në Rusi për të luftuar kundër ushtrisë ukrainase.
Rreth dhjetë ditë më parë, Shtetet e Bashkuara konfirmuan se kishte të paktën 8,000 ushtarë të Koresë së Veriut në rajonin Kursk të Rusisë, i pushtuar nga Ukraina në gusht në një operacion shumë të shpejtë ushtarak.
Sipas zyrtarëve të qeverisë ukrainase dhe amerikane që folën në mënyrë anonime për “New York Times” ditët e fundit, sulmi i Rusisë është i pashmangshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
