Gjermani, arrestohen 8 anëtarë të dyshuar të ekstremit të djathtë që planifikoin grusht shteti

Gazeta Si - Në Gjermani, janë arrestuar tetë burra të dyshuar si pjesë e një organizate terroriste dhe për komplot për të krijuar një regjim të frymëzuar nga nacional-socialistët në shtetet lindore të vendit.

Sipas prokurorëve federalë gjermanë, të dyshuarit janë pjesë e një grupi të ekstremit të djathtë të quajtur "Saechsische Separatisten", ose "Separatistët e Saksonisë" dhe janë trajnuar për të kryer një grusht shteti për të përmbysur sistemin demokratik: "Ata po planifikonin të sulmonin popullin dhe shtetin tonë me forca të armatosura”, - shpjegoi ministrja e Brendshme gjermane, Nancy Faeser.

Shtatë nga tetë të arrestuarit, sipas agjencisë së lajmeve "Reuters", u ndaluan në Lajpcig, Drezden dhe Meissen, ndërsa i teti në Zgorzelec, një qytet kufitar polak.

Operacioni përfshinte rreth 450 agjentë në të gjithë Gjermaninë, por edhe në Austri dhe Poloni: ndër të tjera, u kontrolluan rreth 20 shtëpi dhe ambiente të të paktën shtatë personave të tjerë që kishin lidhje me grupin ose që dyshohet se e bënin këtë.

Grupi në qendër të hetimit ekziston të paktën që nga nëntori 2020 dhe përbëhet nga 15-20 individë, ideologjia e të cilëve bazohet në racizëm, antisemitizëm dhe teori konspirative.

Sipas asaj që prokurorët federalë thanë gjatë një konference për shtyp, tetë të arrestuarit morën trajnim paraushtarak, duke mësuar të përdornin armë ose të kryenin patrulla.

Gjatë kontrolleve u gjetën kostume kamuflazhi, helmeta luftarake, maska kundër gazit dhe jelek antiplumb.

Midis të arrestuarve janë katër anëtarët e dyshuar themelues të grupit të ekstremit të djathtë, të identifikuar nga gazetat gjermane si Joerg S., Joern S., Karl K. dhe Norman T.; të tjerët do t'i ishin bashkuar grupit më vonë, por ende nuk ka asnjë lajm për mënyrat e kontaktit apo anëtarësimit.

Disa gazeta shkruajnë se kur u bashkuan disa prej tyre ishin adoleshentë dhe se më i madhi është vetëm 25 vjeç.

Nuk është hera e parë që njerëz arrestohen në Gjermani me akuza të ngjashme me ato që çuan në arrestimin e tyre.

Në vitin 2022, më shumë se njëzet persona të ekstremit të djathtë të lidhur me lëvizjen "Reichsbürger" ("qytetarët e Perandorisë") u arrestuan gjatë një operacioni masiv policor me akuzat se donin të organizonin një grusht shteti dhe të rrëzonin qeverinë për të vendosur një monarki.

Midis tyre ishin një anëtar i fisnikërisë së lashtë gjermane, oficerë të ushtrisë dhe policisë, madje edhe një ish-deputet.

Lëvizja argumentoi se Gjermania moderne, ajo e lindur pas Luftës së Dytë Botërore, nuk ishte një shtet i vërtetë sovran, por një shoqëri tregtare e krijuar nga fuqitë ndërkombëtare.

Për këtë arsye, ai besonte se të gjithë qytetarët gjermanë duhet të ribashkohen nën një perandori të re (Reich), e cila duhet të kthehet në kufijtë e perandorisë gjermane të fillimit të shekullit të njëzetë. Aktualisht shumë nga personat e arrestuar në vitin 2022 janë në gjyq.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.