Nga Gazeta ‘Si’- Rusia është gati për negociata me Ukrainën. Kështu deklaroi Presidenti i Rusisë, Vladimir Putin gjatë një pritje për ambasadorët e rinj të 28 vendeve të akredituar në vend.
Ai tha se Rusia mbron formimin e një sistemi të drejtë të marrëdhënieve ekonomike botërore pa sanksione të paligjshme, kufizime të motivuara politikisht dhe sanksione të njëanshme jolegjitime.
“Unë kam thënë vazhdimisht se Rusia nuk është vetëm e gatshme për negociata, por se në një moment, në fillim të konfliktit, ajo i zhvilloi këto negociata dhe se gjithashtu u nënshkrua një marrëveshje e pranueshme reciprokisht. Ishte pala ukrainase, me këshillat e jashtme, që e hodhi poshtë këtë marrëveshje”, tha Putin.
Putin e quajti kursin armiqësor të përshkallëzimit dhe zgjatjes së konfliktit, të cilin disa vende perëndimore kanë zgjedhur për t’i shkaktuar një “disfatë strategjike” Rusisë, thellësisht të gabuar. “Llogaritje të tilla mund të bëhen vetëm nga ata që nuk e dinë dhe nuk duan të dinë historinë e Rusisë dhe nuk marrin parasysh unitetin, qëndrueshmërinë dhe kohezionin e popullit rus”, tha Putin.
Në ceremoninë e dorëzimit të letrave kredenciale morën pjesë ambasadorët e Bosnje-Hercegovinës, Kanadasë, Japonisë, Izraelit, Shqipërisë, Indisë, Argjentinës, Bjellorusisë, Italisë, Spanjës, Danimarkës, Belgjikës, Holandës, Finlandës, Armenisë dhe Azerbajxhanit. Ambasadori shqiptar në Federatën Ruse do të jetë diplomati i karrierës, Genc Pecani.
Sakaq, Ministrat e Jashtëm të grupit të shtatë vendeve demokratike thanë se ishin shumë të shqetësuar nga vendosja e trupave të Koresë së Veriut në Rusi dhe mundësia që ato mund të përdoren në luftën kundër Ukrainës.
Kjo sipas tyre shënon një zgjerim të rrezikshëm të konfliktit. Ata thanë se ishin thellësisht të shqetësuar për potencialin për çdo transferim të teknologjisë bërthamore ose raketore balistike në Korenë e Veriut dhe do të punonin me partnerët ndërkombëtarë “për një përgjigje të koordinuar ndaj këtij zhvillimi të ri”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
