Barack Obama ka një mesazh për meshkujt që nuk duan të votojnë për Kamala Harris

Gazeta Si - Ish-presidenti amerikan Barack Obama mbajti tubimin e tij të parë për të mbështetur kandidaturën e demokrates Kamala Harris në zgjedhjet presidenciale të nëntorit.

Nga Pittsburgh, Pensilvania, një nga shtetet kryesore të lëvizjes, Obama sulmoi kandidatin republikan Donald Trump, duke thënë se ai "mendon vetëm për veten" dhe se ai është "një milioner 78-vjeçar që vazhdon të ankohet".

Përpara se të mbërrinte në tubim, Obama bëri një ndalesë të papritur në një nga zyrat e vullnetarëve të fushatës së Harris për t'i falënderuar ata.

Dhe aty, duke iu referuar disa raportimeve, sipas të cilave entuziazmi për kandidaten demokrate ishte zbehur dhe disa meshkuj afrikano-amerikanë kishin vendosur të mos merrnin pjesë në zgjedhje, ai iu drejtua drejtpërdrejt burrave duke u thënë të mos justifikoheshin:

“Një pjesë e kësaj më bën të mendoj dhe po flas drejtpërdrejt me burrat, se, mirë, thjesht nuk ju pëlqen ideja për të pasur një grua si presidente (…) A po mendoni të hiqni dorë ose të mbështesni dikë që ka një histori denigrimi ndaj jush, sepse mendoni se është një shenjë force (ndaj grave), sepse kështu do të thotë të jesh burrë? Duhet të nënçmojmë gratë? Nuk është e pranueshme”, - i tha ish-presidenti amerikan të pranishmëve.

Më pas, gjatë mitingut, Obama tha se Harris është "një lidere që e ka kaluar jetën duke luftuar për njerëzit që kanë nevojë për një zë dhe një shans" dhe shtoi se "ajo është po aq e përgatitur për këtë punë, sa çdo kandidat presidencial".

Nëse Harris fiton zgjedhjet, ajo do të bëhet presidentja e parë femër e Shteteve të Bashkuara të Amerikës. Harris është në vështirësi mes burrave, veçanërisht të rinjve, të cilët janë zhvendosur gjithnjë e më shumë drejt Partisë Republikane vitet e fundit.

Nga ana tjetër, gratë kanë më shumë gjasa të votojnë për Partinë Demokratike. Sipas sondazhit të fundit nga "New York Times/Siena Poll", 56% e grave synojnë të votojnë për Harrisin dhe 53% e burrave për Trump.

Pakënaqësia në rritje e elektoratit afro-amerikan, është gjithashtu një problem për Harris dhe Partinë Demokratike.

Historikisht, afro-amerikanët kanë votuar në masë dërrmuese për demokratët, por vitet e fundit Partia Republikane ka arritur të rrisë mbështetjen e saj (në një mënyrë të kufizuar, por jo të parëndësishme).

Në një sondazh të fundit të kryer nga Shoqata Kombëtare për Përparimin e Njerëzve me Ngjyrë (NAACP, një nga shoqatat e para dhe më të rëndësishme të të drejtave civile në Shtetet e Bashkuara), midis tyre, 51% thanë se do të votonin për Harrisin dhe 27% për Trump. Në vitin 2008, 95% e votuesve me ngjyrë, votuan për Obamën. Në vitin 2020, 87% votuan për Bidenin.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.