.png)
Nga Gazeta 'Si'- Asambleja e Përgjithshme e OKB-së miratoi me shumicë dërrmuese rezolutën që bën thirrje për t’i dhënë fund pushtimit “të paligjshëm” të Izraelit në territoret palestineze brenda 12 muajve.
Rezoluta, e cila u drejtua nga Palestina, u miratua me konsensus dërrmues me 124 shtete anëtare që votuan pro, 14 kundër dhe 43 abstenime.
Shqipëria abstenoi së bashku me disa vende të tjera europiane ndërsa vetë Izraeli dhe SHBA votuan kundër rezolutës.
#BREAKING
— UN News (@UN_News_Centre) September 18, 2024
UN General Assembly ADOPTS resolution demanding that Israel “brings to an end without delay its unlawful presence” in the Occupied Palestinian Territory, and do so within 12 months
Voting result
In favor: 124
Against: 14
Abstain: 43 pic.twitter.com/hIwn7y6EY4
Kjo është rezoluta e para që nga viti 1982 që shpreh hapur sanksionet kundër Izraelit dhe ku thuhet se: “Shqetësimet e Izraelit për sigurinë nuk mund të tejkalojnë parimin e ndalimit të përvetësimit të territorit me forcë”.
E bashkësponsorizuar nga Turqia së bashku me më shumë se 50 shtete anëtare, rezoluta thekson që pushtimi i territoreve palestineze nga Izraeli është i paligjshëm sipas ligjit ndërkombëtar, duke përfshirë vendimet nga Gjykata Ndërkombëtare e Drejtësisë (GJND) dhe Këshilli i Sigurimit i OKB-së.
Duke vënë në dukje se vendbanimet kolone izraelite shkelin gjithashtu ligjin ndërkombëtar, rezoluta pohon se populli palestinez ka të drejtën e vetëvendosjes sipas Kartës së OKB-së.
Ajo ripohoi se çështja e Palestinës është “përgjegjësi e përhershme e Kombeve të Bashkuara” derisa të zgjidhet në përputhje me të drejtën ndërkombëtare, ndërsa thekson nevojën urgjente që Izraeli t’i japë fund okupimit të tij që filloi në vitin 1967.
Më tej, rezoluta i bën thirrje Sekretarit të Përgjithshëm të OKB-së Antonio Guterres që të paraqesë një raport mbi zbatimin e rezolutës brenda tre muajve nga miratimi i saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
