Ministri i Kulturës në Itali, Gennaro Sangiuliano, është bërë kryefjalë e mediave të huaja, pasi u zbulua se kishte marrëdhënie jashtëmartesore me një grua të famshme në rrjetet sociale.
Gruaja, Maria Rosaria Boccia, publikoi disa dokumente që sipas saj tregojnë se ajo ka punuar si këshilltare e ministrit italian dhe ka marrë pjesë në udhëtime të shumta pune.
Në një intervistë televizive, Sangiuliano hodhi poshtë pretendimet se Boccia ishte e punësuar në ministrinë e Kulturës, por pranoi se ka një lidhje mes tyre. Gjithashtu, ai sqaroi se shpenzimet e udhëtimeve me 41-vjeçaren nuk janë mbuluar nga buxheti i ministrisë, por ishin shpenzime personale.
I përlotur, ministri italian i Kulturës i kërkoi falje familjes për momentet e vështira që po përjeton, si pasojë e tradhtisë së tij dhe presionit mediatik.
“Personi i parë që duhet t’i kërkoj falje është gruaja ime, një person i jashtëzakonshëm, më pas Giorgia Melonit, të cilën e turpërova dhe bashkëpunëtorëve të mi, të cilët e gjetën veten të përfshirë në këtë aferë.”- kështu tha ministri i Kulturës, Gennaro Sangiuliano, i cili shtoi se pas kësaj i kishte ofruar dorëheqjen kryeministres Meloni, por ajo nuk kishte pranuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.