.png)
Gazeta Si - Presidenti meksikan Andrés Manuel López Obrador, tha të martën se aktualisht ka "një pauzë" midis Meksikës dhe ambasadorëve të SHBA-së dhe Kanadasë në vend, pasi ata kritikuan hapur një propozim gjithëpërfshirës të reformës gjyqësore në ditët e fundit për të cilin qeveria meksikane po punon.
Lopez Obrador theksoi se prishja e marrëdhënieve ka të bëjë me ambasadat nga të cilat erdhën kritikat dhe jo me vendet në tërësi.
Javën e kaluar, ambasadori amerikan Ken Salazar e përcaktoi ligjin e propozuar, të përshkruar si një nga ndryshimet më të rëndësishme në sistemin gjyqësor meksikan në dekadat e fundit, si "një rrezik për demokracinë" dhe tha se ai mund të rrezikojë marrëdhëniet tregtare midis Meksikës dhe Shteteve të Bashkuara.
López Obrador u përgjigj duke thënë se kritikat e tij shkelin sovranitetin meksikan dhe akuzoi Departamentin e Shtetit të SHBA-së se e këshilloi atë të thoshte këto gjëra.
Ambasadori kanadez në Meksikë, Graeme Clark nga ana e tij kishte thënë se “Investitorët kanadezë janë të shqetësuar. Ata duan stabilitet. Ata duan një sistem drejtësie që funksionon nëse ka probleme”.
Reforma është pjesë e një përkeqësimi progresiv të marrëdhënieve midis López Obrador dhe gjyqësorit, veçanërisht Gjykatës së Lartë, e cila gjatë vitit të kaluar ka penguar zbatimin e disa propozimeve të presidentit dhe është kritikuar shumë edhe nga brenda.
Ditët e fundit ka pasur një grevë të madhe nga gjyqtarët dhe punonjësit e gjykatave: pika më e kontestuar e projektligjit është ajo që propozon të bëjë zgjedhje të pozitave të gjyqtarëve federalë dhe Gjykatës së Lartë, të cilat numërojnë rreth 1650 punonjës.
Aktualisht në Meksikë të gjithë gjyqtarët emërohen në bazë të kualifikimeve, diplomave dhe viteve të përvojës, siç ndodh tashmë në shumë vende të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
