.png)
Gazeta Si- Pas disa javësh shtyrjeje, Italia duket se ka vendosur të hapë një pjesë të kampit për pritjen e emigrantëve në Gjadër në datën 20 gusht.
Sipas gazetës italiane "La Repubblica", në datën 1 shtator pritet që kampi të hapet plotësisht pas vendimit të Ministrisë së Brendshme.
Por pas dy javësh, pritet nisja e kontingjentit të parë prej 500 njerëzish, përfshirë policinë, karabinierët dhe policinë financiare, të cilët do të duhet të sigurojnë funksionimin e zbatimit të protokollit të marrëveshjes me Shqipërisë.
45 oficerët e parë të policisë italiane morën pjesë në kursin e planifikuar dhe presin të nisen drejt Shqipërisë në datën 20 gusht, teksa do pasohen edhe nga të tjerët. Në total janë 500 policë, karabinierë dhe oficerë të Guardia di Financa.
Manuali strikt i palës italiane
Nga ana tjetër, pala italiane, ka përgatitur një manual, i cilësuar si surreal nga mediat përtej Adriatikut. Dokumenti është dorëzuar gjatë kursit të trajnimit për burrat dhe gratë që do të dërgohen për të menaxhuar burgun 20-vendësh për emigrantët në Gjadër: nga mënyra e të veshurit, deri te konsumimimi i kafesë ulur në tavolinë dhe jo në banak!
Stafi që do shërbejë aty, duke përfshirë edhe ata që do punojnë në kuzhinë apo si sanitarë përveç policëve, do ketë edhe rregulla strikte.
Dhe një prej tyre është “shmangia ndaj kurthit prej grave” dhe në këtë rast ndaj atyre shqiptare, të cilat mund të punojnë aty, por edhe jashtë qendrës. Bëhet fjalë për një kod etike që italianët duhet ta zbatojnë.
Sepse “një burrë që sheh gruan e tij duke u ballafaquar me një burrë tjetër, mund të reagojë keq!", - thuhet në një rresht të dokumentit.
Por jo vetëm kaq, sepse teksa shqiptarët cilësohen një “popull modest”, “lakuriqësia apo veshja jo e mirë në publik nuk është e mirëpritur”, shkruan "La Repubblica". Pra një kod etike edhe për veshjen, përveç sjelljes morale.
Po ashtu, rregullorja për efektivët që do vijnë në Shëngjin dhe Gjadër (Vademecum), përmban konkretisht 14 pika.
Kujdes në bare dhe restorante!
Sipas rregullores së hartuar nga fqinjët italianë, Shqipëria është një vend i sigurt, ndaj duhen shmangur mosbesimet për vendin tonë, ndërsa toleranca fetare mbizotëron.
Veç kësaj, autoritetet italiane janë kujdesur të japin dhe këshilla për punonjësit e tyre, si për kursin e këmbimit monetar, ku paralajmërohen për shkëmbimin e euros dhe se do humbasin 0,29 cent prej saj.
Sipas tyre, në pikën 10, karburanti, veçanërisht nafta, ka një kosto më të lartë në krahasim me atë në Itali, ndërsa duhet të kenë kujdes në përdorimin e automjeteve për shkak të kushteve të pasigurta të rrugëve.
Por bien në sy edhe pika të tjera në rregullore dhe mesa duket, shqetësimi është se prania e forcave të rendit italian mund të shkaktojë disa fërkime. Aty u tregohet agjentëve italianë se si duhet të sillen në bare dhe restorante.
“Konsumimi i kafes nuk është në banak, por vetëm ulur, në restorante përmbajuni menysë, kërkesat për ndryshime nuk janë të mirëpritura”.
Dhe, në fund, rekomandimi i rekomandimeve: “Kini kujdes se si flisni... pothuajse të gjithë shqiptarët dinë italisht!”.
Sekretari i Përgjithshëm i Policisë së burgjeve të UIlpa, Gennarino De Fazio, është shumë kritik për metodat jo-transparente, me të cilat u identifikuan 45 të parët e kontingjentit, duke bërë krahasime mes gjendjes në paraburgimet italiane dhe atyre që po ndërtohen në Shqipëri.
Pasiguri për punimet dhe mbërritjen
Në zonën e Gjadrit, kompanitë që po punojnë për ndërtimin e qendrës së kampit për azilkërkuesit, kanë ende probleme të mëdha me punimet e urbanizimit dhe më 1 gusht ato pak module banimi të montuara nuk kishin as energjinë elektrike.
Nuk ka as një rrugë që të çon direkt në shtëpitë ku do të mbahen azilkërkuesit nga vendet e sigurta, katër në një dhomë në dy krevate marinari siç mund të shihet në parafabrikat ku për momentin nuk ka asnjë gjurmë të ajrit të kondicionuar, sipas medias italiane.
Por pothuajse askush nuk di asgjë për funksionimin e qendrave. Nuk ka ende asnjë komunikim se si do të funksionojë jeta e përditshme në dy qendrat: në Shëngjin duhet të garantohet identifikimi i thelluar i emigrantëve të sjellë pas klasifikimit të parë, i cili përkundrazi do të bëhet direkt në anijet ushtarake italiane.
Atje, ata duhet të lahen në dhjetë dushet e instaluara, të vizitohen në infermieri, të pyeten për qëllimin e tyre për të aplikuar për azil dhe të njoftohen për dekretin e arrestimit nga komisariatit të policisë së Romës.
Dhe më pas, duke kaluar nëpër territorin shqiptar, do të jetë e nevojshme të kryhen përkthimet e emigrantëve, të cilët ndërkohë do të vendosen në paraburgim administrativ, me kusht që, brenda 48 orëve, gjyqtarët e seksionit të imigracionit të Romës të vërtetojnë ndalimin me emigrantët e lidhur me videokonferencë.
Në sallat e gjyqit të Romës tashmë janë vendosur dhjetë ekrane, ndërsa aktualisht asnjë nuk është në Shqipëri.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
