Partizani ka barazuar 1-1 në takimin e parë kualifikues të Conference League kundër skuadrës nga Malta, Marsaxlokk të luajtur në “Elbasan Arena”.
Ndeshja nisi në mënyrën më të mirë të mundshme për skuadrën e trajnerit Orges Shehi, me kapitenin Murataj që shënoi që në minutën e 2-të të takimit.
Por festa e “demave” nuk zgjati shumë, pasi në minutën e 15-të erdhi barazimi nga Yuri.
Ekipi i kryeqytetit tentoi të shënonte golin e avantazhit, ku gjatë sfidës pati disa raste, por pa arritur të gjente dot finalizimin e duhur.
Kështu Partizani shkon në sfidën e kthimit në Maltë, ku do të tentojë fitoren dhe kualifikimin.
Kurse Tirana” ka marrë një barazim 1-1 në Gjeorgji përballë “Torpedo Kutaisi”, në sfidën e vlefshme për raundin e parë kualifikues të Ligës së Konferencës.
Sfida nuk nisi mirë për bardheblutë, të cilët u ndëshkuan në minutën e 20’ nga një autogol i Micit.
Gjithsesi ekipi kryeqytetas nuk u dorëzua dhe arriti të barazonte në minutat e fundit, falë një supergoli të Rimal Haxhiut në minutën e 87-të.
Trajneri Bledi Shkëmbi debutoi kështu me një barazim në ndeshjen e tij të parë zyrtare si trajner i “Tiranës”, në një transfertë të vështirë në Gjeorgji, teksa javën e ardhshme do të luhet ndeshja e kthimit në Shqipëri, ku do të tentohet kualifikimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.