Gazeta Si – Një burrë i armatosur me thikë goditi dhe plagosi të paktën dy persona në sheshin e tregut të Mannheim, në Baden-Wuerttemberg, në Gjermaninë jugperëndimore.
Sipas asaj që zëdhënësi i policisë deklaroi për transmetuesin gjerman NTV, sulmuesi u neutralizua menjëherë, por ende nuk ka detaje të sakta nga sulmi.
Sipas burimeve fillestare, objektivi i pritës, që ndodhi gjatë një takimi të lëvizjes civile anti-islame, Pax Europa, ishte aktivisti Michael Stürzenberger.
Këtë e konfirmoi edhe gazeta “Bild”, e cila ndau një portret të aktivistit dhe që prej kohësh ka drejtuar gishtin drejt politikanëve gjermanë, duke i akuzuar ata se nuk i marrin seriozisht rreziqet që rrjedhin nga Islami.
Stürzenberger, shkruan gazeta gjermane, e ka krahasuar vazhdimisht Kuranin me Mein Kampf të Adolf Hitlerit.
Disa video tregojnë momentet e sulmit, i cili ndodhi rreth orës 11:35: sulmuesi shtyn një person në tokë dhe fillon ta godasë me thikë, më pas sulmon një polic duke e goditur në shpinë.
Në atë moment një oficer tjetër ndërhyn dhe hap zjarr dhe e godet autorin. Policia ende nuk ka dhënë asnjë informacion për gjendjen e të plagosurve.
Aktivisti anti-islam i shënjestruar në pritë, një anëtar i partisë Die Freiheit, filloi “betejën e tij kundër Islamit” pas vdekjes së një miku të tij në një sulm terrorist të pretenduar nga ekstremistët islamikë.
Gjatë viteve ai ka kontestuar ndërtimin e një xhamie të madhe në Mynih duke mbledhur dhjetëra mijëra firma, ka kandiduar për post dhe ka paralajmëruar kundër “islamizimit” të Gjermanisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
