Nga Gazeta 'SI' - Në gjysmën e dytë të vitit 2023, bankat dhanë më pak kredi për individët, me një rënie 1.2 pikë përqindje nga gjysma e parë e vitit.
Banka e Shqipërisë raporton se rënia e ritmit rritës ka ndodhur për shkak të rënies së kërkesës për kredi për banesa, me 3 p.p, por ajo për konsum është rritur me 10.6%.
BSH thotë se arsyeja e stepjes së individëve për kredi ishte norma e interesit dhe shtrenjtimi i kostos së jetesës. Edhe pse bankat lehtësuan kushtet dhe rritën konkurrencën, kreditimi në këtë segment nuk u stimulua.
Financimi i individëve ka qenë më së shumti në lekë, me rritje 13.4%, ndërkohë që rritja e kredisë në valutë është ngadalësuar me 10 p.p në rreth 10%.
E njëjta tendencë është vërejtur dhe në kredinë e bizneseve, të cilat që nga goditja e kursit të këmbimit, kanë vijuar të mbyllin para kohe një pjesë të kredive në euro – dhe i kanë zëvendësuar ato me kredi në lekë. Kreditë në lekë kanë dhe norma më të ulëta interesi.
Kredia për bizneset ka qenë më i luhatshëm thotë BSH, pasi ato shfaqin likuiditet të bollshëm. Gjithsesi kërkesa është në rritje nga bizneset e turizmit dhe shërbimeve, kryesisht të vogla dhe të mëdha.
Portofoli i kredisë për biznesin e vogël u rrit me 6.8% në tremujorin e fundit, ose dy herë më shumë se rritja e shënuar në tremujorin e tretë. Ndërkohë kredia për biznesin e madh, mbasi kaloi në stagnacion në tremujorin paraardhës, është rigjallëruar në 3.4% në fund të vitit.
Financimi për sektorin e industrisë ka vazhduar të tkurret edhe në gjashtëmujorin e dytë, me rreth 5% vit mbi vit, normë kjo më e ulët se tkurrja me rreth 7% e shënuar në pjesën e parë të vitit.
Financimi i sektorëve të bujqësisë, të ndërtimit dhe të tregtisë ka shfaqur norma më të ngadalta rritjeje krahasuar me gjashtëmujorin e parë në 4.8%, 5.2% dhe 5% përkatësisht. Këto zhvillime janë në linjë me kontributin e këtyre sektorëve në rritjen e aktivitetit ekonomik në vend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.