Gazeta si – Pas Rei Manajt dhe Sokol Cikalleshit, ishte radha e Myrto Uzunit të shënonte sot në Europë. Sulmuesi kuqezi realizoi një dygolësh në La Liga, në ndeshjen ndaj Real Sociedadit, që përfundoi me rezultatin 2-3. Nuk mungoi festa me shqiponjë e lojtarit shqiptar.
Uzuni hapi serinë e golave me një penallti, kundërshtari barazoi dhe përsëri futbollisti beratas i dha avantazhin Granadës, duke shënuar me kokë nga afër portës. Skuadra e lojtarit të Kombëtares e pati të vështirë ta mbronte rezultatin dhe në fund u dorëzua përballë forcës së Real Sociedad, që është një ekip Championsi.
Ndeshja e Myrto Uzunit zgjati 81 minuta. Ky dygolësh i tij është një sinjal mjaft i mirë pak muaj para nisjes së Europianit. Ai dhe sulmuesit e tjerë kuqezi duken vërtet të karikuar me skuadrat e tyre, sepse nuk duan ta humbasin kurrsesi eventin madhor të verës.
Për Uzunin ndërkohë ka edhe lajme merkatoje dhe golat sigurisht që ia shtojnë vlerën atij. Ditët e fundit në skenë ka dalë Sevilja, një klub me emër në Spanjë, që ka në planet e së ardhmes edhe futbollistin e Kombëtares shqiptare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
