Gazeta Si – Klubi i Tiranës ka zyrtarizuar sot trajnerin e ri. Erbim Fagu, 36 vjeç, ka marrë drejtimin e bardhebluve, pas largimit të Julian Ahmatajt një ditë më parë.
Fagu, ish-lojtar i Tiranës dhe disa skuadrave të tjera në vend, ka pasur një eksperiencë në Holandë me skuadra moshash. Ai ka qenë pjesë e stafit të Tiranës në sezonin 2021-2022, kur kjo skuadër fitoi titullin. Tani nis aventurën e parë si trajner i parë dhe e fillon direkt me ekipin më të titulluar në Shqipëri.
“Klubi i Futbollit Tirana njofton zyrtarizimin e trajnerit Erbim Fagu. Pas një eksperience si lojtar i spikatur dhe trajner i moshave si brenda edhe jashtë vendit, Fagu rikthehet në shtëpinë bardheblu, tashmë si pjesë kryesore e pankinës së Tiranës.
Fagu është tekniku, i cili ka dhënë kontribut të madh gjatë gjithë rrugëtimit në sezonin 2021-2022 pranë bardhebluve, duke e ndihmuar ekipin e parë në rrugën drejt titullit kampion”, – shkuan klubi kryeqytetas në njoftimin zyrtar për emërimin e Fagut në krye të skuadrës.
Trajneri i ri do të debutojë në stolin e Tiranës që në ditën e parë të punës. Sot luhet ndeshja e Kupës së Shqipërisë me Teutën dhe ai do të drejtojë ekipin. Për bardheblutë Fagu është trajneri i 3-të i këtij sezoni, pas Orges Shehit dhe Julian Ahmatajt.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
