Gazeta Si – Skuadra vendëse gjeti dy herë golin në fundin e pjesës së parë, kuqezinjtë rikuperuan me Zhiru dhe Pulisiç. Bondo në minutën e fundit dhe Kolombo në shtesë i dhanë goditjen Milanit, që dështon kështu në tentativën për t’i marrë vendin e dytë Juventusit.
Në ndeshjen e fundit të javës së 25-të të Serisë A, Milani është mundur 4-2 në fushën e Moncës dhe ka mbetur në kuotën e 52 pikëve, 2 më pak se Juventusi dhe 11 më pak se Interi kryesues.
Ishte një ndeshje rokamboleske në ‘U Power Stadium’, me të zotët e shtëpisë që e mbyllën pjesën e parë në avantazh 2-0, me një penallti të shënuar nga Pesina dhe një gol të Motës. Milani mbeti me 10 vetë thuajse gjithë pjesën e dytë, pasi Joviç u ndëshkua me karton të kuq.
Megjithatë, djemtë e Piolit gjetën forcën të reagonin fillimisht me Zhiru dhe pastaj me Pulisiç 2 minuta para fundit, duke barazuar 2-2. Bondo shtangu sërish Milanin me një gjuajtje nga distanca, ndërsa golin e katërt e shënoi Kolombo në minutën e 5-të shtesë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
