Gazeta Si – Gjykata e Apelit të Posaçëm ka lënë në fuqi dënimin për ish kreun e Gjykatës Kushtetuese, Bashkim Dedja. Dedja është dënuar me 1 vit shërbim prove, pasi akuzave për fshehje të pasurisë.
Ish-gjyqtari akuzohet për kryerjen e veprës penale “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
LEXO EDHE:
‘Beteja’ kundër Vettingut që i hëngri kokën Bashkim Dedjes
Ai u dënua me 6 muaj burg, por iu konvertua me 1 vit shërbim prove nga Gjykata e Posaçme. Bashkim Dedja ankimoi vendimin, por Apeli e la në fuqi duke e “rrëzuar” ish-kreun e Gjykatës Kushtetuese.
Ish gjyqtari Dedja nuk ka bërë deklarimin e saktë për një apartament në Golem. Gjithashtu, ai ka bërë deklarim të rremë për burimin e një apartamenti në Tiranë me sipërfaqe 146 m2, lidhur me një hua të marrë nga kunati i tij.
Bashkim Dedja ishte shkarkuar nga detyra nga shkalla e dytë e vetingut, sepse nuk ka justifikuar si burime të ligjshme dy apartamente dhe një garazh.
SPAK hetoi vitin e kaluar 10 ish-anëtarë të Gjykatës Kushtetuese dhe Gjykatës së Lartë të shkarkuar nga vetingu dhe dyshohet se kanë pasuri të pajustifikuara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
