Gazeta Si – Luhen sot dy nga pesë ndeshjet e javës së 20-të të Superiores. Egnatia kryesuese përballet me Kukësin në transfertë, kurse Tirana ndeshet me Teutën në Durrës.
Egnatia, skuadra që kryeson renditjen me 40 pikë, 5 para Partizanit të vendit të dytë, sot ka një provë të vështirë. Edhe pse Kukësi qëndron në vendet e fundit të tabelës, në fushën e tij është një kundërshtar shumë i fortë. Për më tepër, nga rrogozhinasit ka pasur disa largime me peshë, siç janë sulmuesit Isgandarli dhe Paulauskas.
Tirana, pas fitores me përmbysje në derbin me Dinamon, luan gjithashtu në transfertë. Shkon në Durrës për t’u përballur me Teutën e vendit të fundit që ka nevojë më shumë se kurrë për pikë.
Edhe në këtë ndeshje Tirana pritet të mos ketë të gatshëm kapitenin Filip Najdovski. Dy skuadrat kanë diferencë të madhe pikësh mes tyre në renditje, megjithatë pritet një ndeshje e luftuar, me durrsakët që do të bëjnë gjithçka për të marrë pikë mbijetesë.
Ndeshjet e tjera luhen të shtunën. Partizani ndeshet me Lacin, Vllaznia me Erzenin dhe Skënderbeu me Dinamon.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
