Gazeta Si – Interi nuk gabon, Asllani fiton duelin kuqezi me Ramadanin në Serinë A. Kanë fituar 2-0 zikaltrit kryesues përballë Leçes, duke e lënë të pandryshuar diferencën me Juventusin, që më parë kishte mundur 1-2 Frozinonen në transfertë.
Edhe java e 17-të e Serisë A ka folur për një Inter dominues. Pa kapitenin Lautaro Martinez, skuadra e Inzagit e zgjidhi ndeshjen me golat e Bisek në pjesën e parë dhe Barelës në të dytën. Diferenca me Juventusin ndjekës mbetet kështu në 4 pikë.
Rezultati mund të ishte më i thellë, por portieri i Leçes, Falkone, bëri disa pritje shumë të mira. Ylber Ramadani ishte titullar në këtë ndeshje, si gjithmonë, ndërsa Kristjan Asllanit trajneri Simone Inzagi i rezervoi çerek ore lojë, plus shtesat.
Mesfushori shqiptar i Interit iu afrua golit në një moment, kur goditi fort me të djathtën nga distanca, por portieri kundërshtar i mohoi festën.
Titullar luajti sot edhe Berat Gjimshiti me Atalantën, që u mund 1-0 në fushën e Bolonjës. Kapiteni i Kombëtares ishte më i miri në mbrojtje për skuadrën bergamaske.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
