Gazeta Si – Java e 13-të e Superiores u shty nga ngjarja tragjike e Rrogozhinës, ku humbi jetën sulmuesi ganez, Rafael Duamena. FSHF ka vendosur që kjo javë të luhet më 23 nëntor, menjëherë pas ndërprerjes së kampionatit nga ndeshjet e Kombëtares.
Tashmë ka edhe një vendim se si do të veprohet me ndeshjen Egnatia-Partizani, e ndërprerë në minutën e 24-t, kur Duamena ra pa ndjenja në fushë. Ndeshja do të vazhdojë pikërisht nga kjo minutë, për të luajtur 66 minutat e mbetura të kohës së rregullt. Rezultati ishte 1-1 për aq sa u luajt.
Ndeshja do të vazhdojë me të njëjtin protokoll, pra me të njëjtët lojtarë që ishin në fushë atë ditë. Egnatia bëri zëvendësimin në ato momente, ku vendin e Duamenës e zuri Isgandarli. Megjithatë, loja nuk vazhdoi, sepse lojtarët ishin të tronditur nga ajo që ndodhi. Ata nuk deshën të ktheheshin në fushë pa mësuar fatin e Duamenës, që rezultoi tragjik.
FSHF më pas vendosi shtyrjen e të gjitha ndeshjeve. Kampionati elitar do të kthehet mesjavën e ardhshme, me po ato ndeshje që ishin në kalendar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
