Gazeta Si – Në një deklaratë të tij të fundit për gazetën ‘Panorama Sport’, presidenti i Tiranës, Refik Halili, deklaron se Tirana ka kryer detyrimet financiare ndaj ish-trajnerit Orges Shehi deri në muajin dhjetor.
“Po, është e vërtet që ka mbërritur një shkresë në klub për përmbushje kontraktuale. Datën nuk e kam fiksuar, sepse më duket se nuk kishte. Mund të them vetëm që KF Tirana ka zbatuar, zbaton dhe do të zbatojë marrëveshjen që ka me trajnerin e pezulluar.
Nëse nuk gabohem, por më duhet ta saktësoj, deri në dhjetor gjithçka është e plotësuar nga ana financiare. Kaq mund të them. KF Tirana zbaton çdo kontratë dhe rregull”, – është shprehur Refik Halili pas lajmit se Orges Shehi ka kërkuar përmbushjen e detyrimeve kontraktuale.
Këtë javë Shehi ka dopozituar në federatë një shkresë paralajmëruese përpara se të hapet gjyqi për pagat e prapambetura që nga muaji korrik.
Megjithatë, kjo deklaratë e presidentit Halili duket se e ka habitur pa masë ish-trajnerin bardheblu, apo trajnerin e pezulluar Orges Shehi, i cili i ka dërguar këtë herë një deklaratë publike për habinë e tij, ku nëpërmjet një ‘story’ në Instagramin personal shkruan: “Ça thu mër burrë se na habite…”
Tirana, nga ana e saj, pritet të përmbushë kontratën mes palëve, pasi e ka detyrim, ose do kalojë në heshtje me një marrëveshje që ende nuk duket në horizont.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
