Gazeta Si – Mario Mitaj, djaloshi i lindur në Athinë dhe i rritur sportivisht tek AEK-u, është një nga gjetjet e trajnerit të Kombëtares, Silvinjo. Nuk është një zbulim, sepse mbrojtësi i majtë aty ishte, pjesë e Shpresave, por trajneri brazilian është ai që besoi te 20-vjeçari.
Dhe ka pasur të drejtë, rezultati në fushë ka qenë impresionues. Mitaj ka qenë një pikë kyçe e formacionit kuqezi në këto eliminatore të Euro 2024, ku Shqipëria e ka kualifikimin në ‘xhep’, madje pa frikë mund të quhet i pazëvendësueshëm për momentin. Asnjë lojtar tjetër në atë rol nuk mund të bëjë atë që po bën Mitaj.
Rritja futbollistike e anësorit të majtë është vërtet befasuese. Nga ndeshja në ndeshje ai e ka rritur nivelin, duke bërë gjithmonë e më pak gabime, falë besimit më të madh që ka fituar në vetvete. Është vetëm 20 vjeç dhe me këtë ritëm transferimi i lojtarit në një top klub është vetëm çështje kohe.
Mitaj sa fundi ka bindur edhe skeptikët në Rusi, ku ka pasur shumë kritika për blerjen e tij nga Lokomotiva e Moskës. Në ndeshjen e fundit të kampionatit, barazimin 0-0 në derbin me Dinamon e Moskës, fubollisti shqiptar u shpall ‘Lojtari më i mirë’. Për më tepër nuk luajti në rolin e tij natyral, por në atë të mesfushorit të qendrës.
Një tjetër hap përpara për djaloshin me orgjinë nga Vermoshi. Ai, me qetësinë e tij, vazhdon të ngjitë shkallët në futbollin prfosionist, duke njohur vetëm rritje. Është pa dyshim një nga elementët më premtues të Kombëtares shqiptare dhe kjo falë besimit që i ka dhënë Silvinjo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
