Gazeta Si – Klubi i Kukësit ndodhet në një moment shumë delikat, pas skandalit të pak kohëve më parë me presidentin e tij, Safet Gjicin. Familja e ish-kryebashkiakut të Kukësit zotëron 87% të aksioneve dhe dëshira është për t’i mbajtur, por në kushtet aktuale duket shumë e vështirë.
Ka një interesim nga disa biznesmenë në vend, kryesisht me origjinë nga qyteti i Kukësit, për të blerë ekipin verior. Për momentin është zbuluar vetëm emri i kompanisë së prodhimit të miellit ‘Atlas’, por janë edhe disa kompani të tjera që po negociojnë.
Me shumë mundësi, edhe Kukësi, ashtu si Dinamo vetëm pak ditë më parë, do të ketë aksionerë të rinj, që do ta shpëtonin ekipin e Superiores nga kriza. Gjatë kësaj jave lojtarët bojkotuan stërvitjen, sepse nuk janë paguar prej kohësh. Nga Kukësi ndërkohë janë larguar thuajse të gjithë lojtarët e sezonit të kaluar dhe gjithçka duhet bërë nga e para.
Një tjetër ekip i Superiores që kërkon aksionerë të rinj është Erzeni. Pak ditë më parë te ky ekip u prezantua biznesmeni Ali Kasa, i cili ndërroi mendje më pas dhe tashmë ka vendosur të investojë te Shkumbini i Peqinit, qyteti i origjinës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.