Gazeta Si – Komisioni i Disiplinës dhe Apelit në FSHF është mbledhur sot, një ditë pas ngjarjeve në ndeshjen Tirana-Bylis, ku u dhunuan arbitrat, dhe ka marrë një seri vendimesh për klubin kryeqytetas. Është çelur një hetim disiplinor për atë ndeshje, ndërsa Tirana duhet të luajë pa spektatorë 90 ditë, deri në marrjen e një sanksioni përfundimtar.
Janë dënuar shumica e lojtarëve të Tiranës dhe disa zyrtarë të këtij klubi. Dënimet më të rënda i kanë marrë Visar Bekaj, 1 vit, për nxitje urrejtjeje dhe akte dhune, si dhe Besir Iseni, 24 muaj, pasi ka pështyrë zyrtarët e ndeshjes. Janë dënuar 6 lojtarë të Tiranës dhe disa zyrtarë të saj.
Vendimet e Komisionit të Disiplinës dhe Etikës
Lojtari Visar Bekaj, për nxitje të urrejtjes dhe akteve të dhunës, dënohet me 12 muaj pezullim nga të gjitha aktivitetet dhe gjobë në masën 100.000 lekë.
Albano Aleksi, për sjellje josportive ndaj zyrtarëve të ndeshjes, dënohet me 6 ndeshje pezullim nga të gjitha aktivitetet. Lojtari Aldi Gjumsi, për sjellje josportive ndaj zyrtarëve të ndeshjes, dënohet me 6 ndeshje pezullim nga të gjitha aktivitetet.
Lojtari Bruno Lulaj, për sjellje josportive ndaj zyrtarëve të ndeshjes, dënohet me 6 ndeshje pezullim nga të gjitha aktivitetet. Lojtari Besir Iseni, për pështymjen ndaj zyrtarëve të ndeshjes, dënohet me 24 muaj pezullim nga të gjitha aktivitetet.
Lojtari Florent Hasani, për sjellje josportive ndaj zyrtarëve të ndeshjes, dënohet 4 ndeshje pezullim nga të gjitha aktivitetet.
Zyrtari Arzen Vocaj, për sjellje josportive ndaj zyrtarëve të ndeshjes, dënohet me 8 ndeshje pezullim nga të gjitha aktivitetet.
Zyrtari Kostandinos Jani, për sjellje josportive ndaj zyrtarëve të ndeshjes, dënohet me 8 ndeshje pezullim nga të gjitha aktivitetet. Zyrtari Marvi Kastrati, për sjellje josportive ndaj zyrtarëve të ndeshjes, dënohet me 8 ndeshje pezullim nga të gjitha aktivitetet.
Reagimi i Tiranës: Shuplakë e rëndë për futbollin
Klubi i Tiranës ka reaguar pas vendimeve të Komisionit të Disiplinës me anë të Goldi Halilit, vajzaës së presidentit Refik Halili. Ajo ka lexuar një komunikatë të klubit kryeqytetas, që i konsideron vendimet kthim prapa dhe bën apel për reflektim. Një reagim shumë i butë në dukje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.