Fatjon Rupi – Ndeshja me Teutën, ku Kamza u mund 1-3, ishte e fundit për trajnerin Klodian Duro. Klubi i Kamzës ka bërë të ditur me një postim në faqen zyrtare në Facebook mbylljen e bashkëpunimit me trajnerin elbasanas. Në këtë postim sqarohet se ishin rezultatet e dobëta që sollën këtë situatë. Duket një ndarje shumë paqësore, të paktën nga ana e klubit, që e konsideron Klodian Duron pjesë të familjes.
“Klubi bën të ditur mbylljen e bashkëpunimit me trajnerin Klodian Duro. Duke e falënderuar trajnerin për kontributin e tij të palodhur, përkushtimin dhe gjithçka dha për skuadrën tonë, bëjmë të ditur se rrugët tona ndahen këtu. Mungesa e rezultateve na detyron të bëjmë një zgjidhje tjetër në këtë moment. Trajnerit Klodian Duro i urojmë suksese në karrierën e tij në vazhdimësi dhe e konsiderojmë gjithnjë pjesë të familjes sonë”, – shkruhet në njoftimin e klubit të Kamzës.
Drejtuesit e Kamzës janë duke menduar për emërimin e trajnerit të ri sa më shpejt, sepse ndeshja e radhës është shumë afër. Burime pranë këtij klubi kanë bërë me dije për Gazeta Si se janë tre kandidatura aktualisht për të marrë drejtimin e Kazmës. Në “pole position” duket Julian Ahmataj, ish-trajneri i kësaj skuadre në fundin e sezonit të kaluar, kështu që nëse vendoset zyrtarisht për të, do të jetë një rikthim. Dy kandidaturat e tjera drejtuesit kamzalinj nuk kanë dashur t’i zbulojnë. Kamza është e vetmja skuadër që deri në këtë fazë të kampionatit ka ndërruar dy herë trajner. Pas javës së dytë u largua Bledar Devolli dhe tani, pas javës së 12-të, largohet edhe Duro, për t’ia lënë vendin një trajneri të tretë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
