E zhgënjyer nga cka mendonte se ishin keqperceptimet për njerëzit me aftësi të kufizuara, Logan Kelble filloi të postonte video kërcimi në TikTok dhe video duke bërë grimin, ku shpesh në vëmendje ishte tubi i ushqimit.
Kelble, një 22-vjeçare që jeton në Virxhinian Perëndimore, thotë se duke ndarë jetën e saj me një tub ushqimor dhe sindromën Ehlers-Danlos (EDS), një çrregullim i rrallë që prek indin lidhës dhe shkakton dhimbje kronike, për Kelble, ka qenë një mënyrë për t’i treguar botës se njerëzit me sëmundje ose aftësi të kufizuara nuk përcaktohen nga kushtet e tyre.
“I nisa llogaritë në rrjetet sociale sinqerisht për të bërë miq, sepse nuk njihja askënd që kishte atë që kisha unë”, tha ajo.
“Njerëzit shpesh më trajtojnë ndryshe ose ndiejnë keqardhje për mua. Personat me aftësi të kufizuara nuk janë fizikisht të njëjtë, por mendërisht, ne jemi po aq të aftë për të qenë njerëz normalë dhe inteligjentë”.
Kelble dhe Nicole Spencer, një studente mjekësie që gjithashtu jeton me EDS, janë në mesin e një numri të rinjsh që përdorin mediat sociale për të luftuar keq perceptimet e aftësive të kufizuara dhe për të folur për shëndetin e tyre mendor dhe fizik.
Përdorimi i mediave sociale nga njerëzit me aftësi të kufizuara është delikat në një kohë kur kompanitë e mediave sociale po përballen me reagimin e ligjvënësve, ekspertëve shëndetësorë dhe madje edhe përdoruesve të tyre, të cilët thonë se aplikacionet si Instagram dhe TikTok i inkurajojnë njerëzit të postojnë momente të lumtura të jetës së tyre, duke çuar në ulje vetëvlerësimi tek përdoruesit e rinj.
Për shembull, Facebook, që e ka riemërtuar veten Meta Platforms, ishte në qendër të polemikave vitin e kaluar kur Frances Haugen zbuloi dokumente që tregonin se Facebook e dinte se Instagram po dëmtonte vetë imazhin e disa adoleshentëve.
“Çelësi për përdoruesit është të shmangin krahasimet”, tha Jacqueline Sperling, psikologe klinike.
Mediat sociale mund të jenë shpërblyese kur përdoren për të lehtësuar lidhjet reale, si për shembull bërja e planeve për t’u takuar dhe për të kaluar kohë së bashku, por janë shkatërruese kur njerëzit fillojnë e bëjnë krahasime me të tjerët që mund të kenë më shumë pëlqime, tha Sperling.
“Ngushëllimi” në internet ka ardhur natyrshëm për Spencer.
Spencer ka paketuar dhe dërguar më shumë se 400 paketa të personalizuara për fëmijët dhe të rinjtë me sëmundje kronike përmes një faqe në Instagram, financuar nga donacione.
Artikujt tipikë në paketat e kujdesit mund të përfshijnë produkte që mund të përdoren për tubat e ushqimit.
Spencer tha se marrësit i kanë thënë asaj se paketat i kanë ndihmuar ata të ndihen të pranuar në komunitet.
Megjithatë, ana e errët e mediave sociale ndonjëherë ka ndërhyrë, si për të treguar se është aty.
Në TikTok dhe Reddit kanë kritikuar pamjen e Kelble ose e kanë akuzuar atë si një person që po e përdor sëmundjes dhe që në fakt përdor një tub të rremë për ushqim.
“Është absurde”, thotë Kelble. Thjesht i bllokoj dhe vazhdoj përpara”.
Një reporter i Reuters shqyrtoi të dhënat mjekësore dhe foli me mjekët për Spencer dhe Kelble, të cilët konfirmuan gjendjen e tyre. Një fotograf i Reuters i shoqëroi ata në takimet me mjekun dhe dokumentoi rutinat e tyre të përditshme të përgatitjes së medikamenteve të shumta në shtëpi dhe filmimit të videove për mediat sociale.
Me probleme kronike që e bëjnë të vështirë udhëtimin ose daljen nga shtëpia për periudha të gjata kohore, aplikacionet kanë ndihmuar si Kelble ashtu edhe Spencer të krijojnë miqësi me njerëz në cepa të ndryshme të vendit.
Ajo që filloi si një bisedë normale në Instagram përfundimisht u kthye në thirrje pothuajse ditore në FaceTime mes Kelble dhe tre miqve virtualë. Krijimi i një lidhjeje me ato, të cilët të gjithë gjithashtu jetojnë me një sëmundje kronike, e ka ndihmuar Kelble të kalojë kohë të vështira.
“Ata vërtet më shpëtuan jetën disa herë”, tha Kelble.
Disa ndjekës e kanë ndihmuar gjithashtu Kelble duke dërguar donacione.
Pas disa përvojave që i kanë ndryshuar jetën, të cilat përfshijnë humbjen e shoqes së saj më të mirë të fëmijërisë nga kanceri dhe më pas të jetuarit me sëmundjen e saj kronike, plani i Spencer është të bëhet pediatre dhe të punojë me fëmijët dhe adoleshentët.
“Duke menduar të gjitha përvojave që kam pasur, duke qenë vetë e sëmurë ose duke parë miqtë e mi të kalojnë nëpër sëmundje shumë më sfiduese, nëse do të mund ta bëja një fëmijë të ndihej pak më pak vetëm, kjo do të ishte ëndrra ime e plotësuar”, tha ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
