Ilir Metën nuk e shqetëson nisma e Partisë Socialiste për të ndryshuar ligjin e dosjeve, pasi këmbëngul se dokumenti për të cilin flet Autoriteti është i falsifikuar dhe se nuk është ai I.M., që përmendet në të.
“Është një përgjegjësi e madhe e Autoritetit të konfirmuar si pjesë e falsifikimit. Autoriteti i Dosjeve e di shumë mirë që Ilir Rexhep Metaj nuk ka qenë bashkëpunëtor i sigurimit. Ata e dinë shumë mirë se kush ka qenë bashkëpunëtori në rastin konkret, sepse ndodhet në dy dosje. Ata që e kanë orkestruar këtë skenar, e dinë shumë mirë që Ilir Meta nuk ka ikur ndonjëherë në konvikt”, tha kreu i Partisë së Lirisë.
Meta thirri një konferencë për shtyp dhe jo vetëm ligjin për dosjet, po ftoi socialistët që të miratojnë një dokument a ligj të posaçëm për të hapur të gjithë dokumentet që ndodhen në arkivë për të. “Që nga çerdhja”, tha ai,
Autoritetin e Dosjeve e paralajmëroi se do të mbajë përgjegjësi dhe ajo nuk do të jetë vetëm institucionale.
“Autoriteti i Dosjeve do të mbajë përgjegjësi ligjore për këtë shkelje ligjore që ka bërë. Do të mbajnë përgjegjësi individuale personat e përfshirë”, u shpreh ai.
Meta thotë se Autoriteti e ka pasur mundësinë që ta verifikonte në 2017 kur u zgjodh President, ndërsa bëri publik edhe qëndrimin e katër deputetëve të Partisë së Lirisë për nismën e socialistëve në Kuvend.
“Jam i sigurt që qëndrimi edhe i deputetëve të Partisë së Lirisë, ka qenë dhe do të jetë transparencë e plotë për cilindo”, u shpreh Meta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
