.png)
I konsideruar si një nga juristët më të mirë në PS, ish-anëtari i Këshillit të Lartë të Drejtësisë, Armando Subashi, u përfshi në politikë që prej zgjedhjeve të 2009-ës me “bekimin” e Gramoz Ruçit dhe Fatmir Xhafës si deputet për qarkun Fier dhe anëtar i Komisionit të Ligjeve.
Me fitoren e parë të Edi Ramës në 2013-ën si kryeministër, Subashi do të propozohej prej tij në detyrën e kryetarit të Bashkisë së Fierit, vetëm dy vite më pas.
Me një profil kryesisht të ulët dhe jo i zhurmshëm në skenën politike, Subashi shihej në PS si një nga ekspertët e zotë në fushën juridike paçka se në të kaluarën e tij ai kishte një përplasje me ish-Presidentin Alfred Moisiu për emërimin e tij në Gjykatën e Krimeve të Rënda.
Me dalje të rralla në media, Subashi ruan të njëjtin profil të ulet edhe gjatë detyrës së tij si kryetar i Bashkisë. Por jo akuzat ndaj tij.
Pas një kontrolli dy vjeçar këtu e dy vite më parë, KLSH konstatoi shkelje në bashkinë Fier me pasojë dem financiar për buxhetin e shtetit për rreth 23 tendera.
Paralelisht, opozita e akuzonte atë për lidhje të forta me përfaqësues të botës së krimit, duke i pajisur ata me tendera dhe leje ndërtimi, por edhe për abuzime me fondet gjatë rehabilimit të lumit Gjanica.
Akuzat në njërën anë dhe raportet në anën tjetër nuk morën drejtim konkret, përveçse prodhuan zhurma. Siç ishte edhe rasti i Petro Kocit që drejtoi punën për zgjedhjet parlamentare të 25 Prillit në Fier.
Koçi, i konsideruar me një tjetër klan në Fier, atë të ish-kryetarit të Bashkisë, Baftjar Zeqo, nuk mori rezultatin e pritshëm në atë qark për zgjedhje nga analiza e brendshme që u bë në PS.
Vetë ai do të fajësonte dy drejtori në Fier ndërsa shumëkush e kuptoi se gishti ishte drejtuar ndaj vetë Armando Subashit.
“Efektet e SPAK dhe të Reformës në Drejtësi po japin rezultat. Bota e krimit dhe të korruptuarit kanë filluar të ndjejnë frikë nga ligji.
Këto efekte i mirëpresim edhe në Fier ku duart e krimit janë shtrirë mbi financat publike.
Protagonistë të trafikut të drogës dhe të dhunës tashmë kanë legalizuar subjekte biznesi që fitojnë tendera publike.
Të fuqizuar sidomos duke larë paratë e pista në industrinë e ndërtimit ata vazhdojnë të përvetësojnë fitime kolosale nga taksat tona.
Organet ligjzbatuese nuk duhet të lejojnë që qyteti ynë t’i nënshtrohet botës së krimit të organizuar”, postoi Petro Koçi në Facebook, duke “larë duart” më vonë, kur tha se akuza nuk i drejtohej Subashit, paçka se tenderat publik në Fier mund t’i japë vetëm ai organ.
Koçi u thirr në SPAK për akuzat e tij që nuk ndryshuan nga postimi i mëhershëm nga vetë ai
Në PS nuk foli askush edhe pse akuzat vinin nga kryetari i PS-së së Fierit, deputet dhe ish-zv/minister ndërsa faji për vetë Petro Koçin mbeti jetim.
“Unë si politikan denoncoj fenomenin, jo emrat konkretë” u shfajësua ai
Petro Koçi nuk foli më për akuzat dhe dalja e tij e vetme lidhet vetëm me “vizitën” në SPAK.
Armando Subashi nxitoi të sqaronte se askush nga Prokuroria e Posaçme nuk kishte zbritur në bashkinë e Fierit për akuzat e ngritura.
Vetëm një javë para denoncimit të Petro Koçit, kryeministri Edi Rama nuk do të kursente lëvdatat ndaj Subashit në një mbledhje me kryebashkiakët në gjithë vendin.
Duke hequr një paralele me atë që kish ndodhur në Lushnjë, (pas arrestimit të Fatos Tushes) Rama do ta veçonte Subashin si një njeri që “di dhe do ta bëjë punën”.
Për të ardhur tek debati i fundit që e ka zanafillën para një viti kur LSI-ja i depoziton një kallëzim penal në SPAK për inceneratorin e Fierit.
LSI do ta kallëzonte Subashin për ‘Shkelje të Barazisë së Pjesëmarrësve në Tendera’, dhe ‘Për shpërdorim detyre” gjatë procedurës së ndjekur për ngritjen e inceneratorit.
Për Subashin po flet edhe PD-ja teksa po drejton komisionin hetimor parlamentar për inceneratorët.
Por impakt të drejtpërdrejte publik rasti “Subashi” pati vetëm gjatë muajit korrik të vitit të kaluar, kur për më shumë se tre ditë Fieri u mbyt nga djegia e plehrave dhe smogu i krijuar.
Subashi do të njoftonte në një dalje të vonuar për mediat se së shpejti situata do të ndryshonte me vënien në funksion të inceneratorit.
Debati për inceneratorin e Fierit vijon ende, ndërsa SPAK ka njoftuar se po e heton.
Armando Subashi pa dyert e SPAK-ut vetëm të premten e 18 shkurtit për më shumë se tre orë, pa avokat. Atij nuk i duhet një i tillë. Të paktën deri tani. Dhe mbi të gjitha nëse është aq i aftë sa thuhet për të në PS; për tu mbrojtur vetë në fushën që njeh më mirë, atë të ligjit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
