Edhe Shtetet e Bashkuara të Amerikës bëjnë thirrje që Parlamenti të kalojë reformën kushtetuese për të zgjatur mandatin e anëtarëve të KPK dhe KPA.
Pas një takimi që zhvilloi me kreun e OSBE-së në Tiranë, Vicenco Del Monako, ambasadorja amerikane Yuri Kim, tha Kuvendi duhet të miratojë reformën kushtetuese për të zgjatur mandatin e Komisionit të Pavarur të Kualifikimit, Kolegjit të Posaçëm të Apelimit, Komisionerit Publik.
“U takova sot me ambasadorin e OSBE-së Del Monako për të diskutuar një sërë çështjesh. Ne jemi dakord që në përputhje me rekomandimin e IMO-së, Parlamenti duhet të kalojë reformën kushtetuese për të zgjatur mandatin e Vettingut. Gjithashtu pajtohemi që autoritetet dhe palët duhet të veprojnë sipas rekomandimeve të OSBE/ODIHR mbi zgjedhjet”.
Zgjatjen e Vettingut e ka kërkuar edhe Partia Socialiste, e cila ka theksuar se kjo është e domosdoshme për të vijuar më tej procesi i kontrollit të figurës për pjesën e mbetur të gjyqtarëve dhe prokurorëve.
Por Partia Demokratike ka hezituar deri më tani të japë pëlqimin e saj për këtë propozim, duke bërë të ditur se më parë duhet bërë një analizë e plotë për punën e bërë deri më tani nga anëtarët e komisioneve të Vettingut.
Më 15 tetor, Partia Socialiste ndërmori hapin konkret për zgjatjen e afateve të organeve të Vettingut. PS propozon shtyrjen me 2 vite e gjysmë afati të Komisionit të Pavarur të Kualifikimit, ndërsa për këtë, publikisht kanë kërkuar edhe mbështetjen e PD-së, megjithatë nuk ka ende një përgjigje. Mandati i Komisionit të Pavarur të Kualifikimit dhe komisionerëve publik përfundon në qershor të vitit të ardhshëm.
Met @OSCEinAlbania Amb. Del Monaco today to discuss range of issues. We agree that, in line w/ IMO recommendation, Parliament should pass constitutional reform to extend vetting mandate. Also agree authorities & parties should act on recommendations of @osce_odihr on elections.
— Ambassador Yuri Kim (@USAmbAlbania) October 21, 2021
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
