.png)
Nga Megi Iskurti – Nëse dikur shtëpitë e pritjes në Shqipëri vizitoheshin vetëm nga turistë që iu binte rruga andej-tëhu, tani falë platformës “Booking.al” ata janë kthyer në destinancione që përzgjidhen vetë nga njerëzit varësisht kërkesave që kanë.
Pronarët regjistrojnë shtëpitë ose hotelet e tyre në këtë platformë duke përfshirë foto, të dhëna specifike për ambjentet e brendshme, të dhëna për parkimin, për ushqimin dhe për gjithë gamën e e fasiliteteve të tjera që ofrojnë duke u lënë mundësi të hapur bujtësve të bëjnë zgjedhjen që duan.
Nga disa komunikime që Gazetasi.al bëri me disa prej tyre, kuptoi se regjistrimi që kanë bërë në këtë platformë u ka rritur atyre ndjeshëm aktivitetin dhe tani çdo ditë e më shumë dëgjojnë nga turistët fjalinë “Ne erdhëm këtu sepse iu gjetëm në booking.”
“Kore Guest House” ,e lokalizuar në Gjirokastër, e cila që prej themelimit sfidon shpatet shkëmbore, është pikërisht një nga shtëpitë e pritjes që aktiviteti ka ardhur duke iu rritur pas regjistrimit në këtë platformë.
I ka hapur dyert për turistët në 5 gusht të vitit 2015 por vetëm 2 vitet e fundit falë kësaj platforme ajo është shtuar në listën e shtëpive kryesore të Gjirokastrës dhe numëron në booking gati 400 përshtypje të shënuara nga turistët ku në secilin prej tyre mund të vëresh nota pozitive dhe mikpritje.
Matilda, hostesi, është përpjekur që në krye të herës që turistët të paguajnë për të marrë në kthim një eksperiencë të këndshme qëndrimi, ku ushqimi, pritja dhe akomodimi të ia ketë vlejtur.
Pasi i përcjell, ajo u kërkon të gjithëve që nëse kanë mbetur të kënaqur të lënë një koment të vogël në këtë platformë sepse tashmë ajo e di që sa më shumë të tillë, aq më shumë turistë të tjerë nxiten për të shkuar e për ta vizituar.
Duke parë fotot e shkrepura dhe duke nxjerrë në pah këndet më të bukura të shtëpisë, platforma të ngjall menjëherë dëshirën për të rezervuar dhe për të shijuar një mëngjes në tarracën e Kore Guest House, aty ku si i ulur në një lozhë teatri mund të shijosh të gjithë pamjen e çative të hirta që Gjirokasatra servir.
Por kjo platformë veçmas aktivitetit të shtëpive ka rritur edhe çmimet sepse pronarët tashmë e shijojnë të gjithë vëmendjen që marrin nga booking dhe e shfrytëzojnë atë për të fituar disa para më shumë.
Nëse dikur një natë qëndrimi kushtonte rreth 15 mijë lekë të vjetra sot ky çmim është rritur me 10 mijë lekë po të vjetra më shumë.
Qyteza e lashtë e Beratit e cila sëbashku me rrethinat numëron rreth 65 mijë banorë është vizituar ngahera prej turistëve që gjithmonë kanë spikatur karakteristikat e veçanta të tij dhe po vizitohet akoma më shumë falë marketingut në këtë platformë.
Shtëpitë 500 vjeçare të Beratit po rikthehen gjithnjë e më shumë në hotele ku stafetën për të zhvilluar më tej turizmin e kanë marrë pikërisht pronarët e tyre duke mos e lënë më atë në dorë të spontanitetit dhe mungesës së vëmendjes nga pushteti lokal.
Nëse në fillim në këtë platformë numëroheshin rreth 50 vende për akomodim, tani numërohen 118 të tilla me të gjithë informacionet e nevojshme që një turist duhet të dijë përpara se të vendos të qëndrojë diku.
Banorët nuk duan që ta lënë qytetin të plaket me ëndrrën për zhvillimin e turizmit dhe duke u regjistruar në këtë platformë ata duken se duan të dalin nga varfëria më të cilën janë përballur stoikisht.
Në vitin 2019 përpara se të godiste pandemia, qyteti i një mbi një dritareve është vizituar nga rreth 60 mijë turistë ku agjencitë japoneze e renditën atë edhe në 30 qytetet më të bukura të Europës.
Hoteli Belgrad në Mangalem, ka që në vitin 2013 që ka nisur aktivitetin e pritjes së turistëve por falë booking ai ka marrë një tjetër zhvillim dhe kërkesat për rezervime dhomash sa vijnë dhe rriten.
Ai përbëhet nga 15 dhoma fjetje dhe ndryshe nga dikur kur ishte vetëm një shtëpi e vjetër familjare sot është kthyer në një hotel të mirëfilltë.
Platforma booking duket se u ka dhënë akses edhe “zë” shtëpive pritëse edhe në fshatrat më të thellë në zonat malore, ku vlen të përmendet edhe Guest House Korabi në fshatin Radomirë, buzë rrugës tek merr shtegun për Korab.
Ajo nuk njihej në fillim nga të tjerët, veçse nga banorët e zonës por duke u promovuar në këtë platformë është rritur edhe aktiviteti i njerëzve që e vizitojnë dhe zgjedhin të kalojnë disa ditë mes natyrës dhe ajrit të pastër që e rrethon.
Kjo platformë në të cilën vërshojnë përshtypje, foto, të dhëna dhe komente për të gjithë vendqëndrimet duket se është kthyer automatikisht edhe në kërkimin e parë që bëjnë të rinjtë përpara se të vizitojnë një vend.
Të njëjtën gjë na pohon dhe Ilva, një 24 vjeçare e cila punon si programuese por ka pasion të madh udhëtimet.
“Thuajse çdo fundjavë zgjedh një vend specifik në Shqipëri për të udhëtuar dhe veprimi i parë që bëj është të futem në platformën e booking.
Aty përveç se mund të shikosh fotot, vendndodhjen dhe disa nga atraksionet turistike që janë rreth saj, një shtyllë e rëndësishme që më bën të vlerësoj nëse dua apo jo të shkoj diku janë pikërisht përshtypjet që lënë të tjerët para meje.
Përgjithësisht të huajt janë shumë realë në atë që thonë dhe përshtypjet e tyre i marr gjithnjë për bazë.
Në fund edhe unë sigurohem të lë komentin tim që gjithashtu të jetë i vlefshëm edhe për ndonjë turist tjetër.”-tregon ajo për gazetasi.al
Platforma booking duket se i ka bërë shtëpitë “plaka” të Shqipërisë të nusërojnë gjithnjë e më shumë për turistët…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
