Një incident është regjistruar mbrëmjen e të martës mes mbështetësve të PD-PS, teksa po numërohej kutia e fundit në Durrës.
Protagonist të përplasjes në distancë kanë qenë kryetari i PD së Durrësit, njëherësh kandidati për deputet, Ferdinand Xhaferaj dhe ish-kryebashkiaku socialist, Vangjush Dako. Ky i fundit dhe drejtuesit e tjerë socialistë, gjendeshin prej disa orësh në KZAZ nr.21 në Durrës duke ndjekur numërimin.
Ndërsa Xhaferaj ka hyrë në Pallatin e Sportit për të ndjekur procesin, ish-kryebashkiaku i Durrësit, e ka thirrur dhe i ka thënë “Urime”.
Xhaferaj shkon drejt tij dhe i thotë “Je bo politikan Vangjush Dako?” Më pas, një mbështetës i PS i del përpara dhe debaton me të.
Xhaferaj mësohet t’i ketë thënë që jeni të gjithë “zagarë të Dakos”. Ai i është kundërpërgjigjur. “Ti çfarë je, je më i mirë se ne. Çfarë zagarësh qenkemi ne?” Pas kësaj, një mbështetës i PD e godet atë të PS dhe fillon përplasja. Më pas janë të tjerë që ndërhyjnë duke i ndarë.
Një incident që ka ndodhur drejt fundit të procesit të numërimit, ku rezultati përfundimtar është, PS me 8 mandate dhe PD me 6 të tilla, me LSI-në pa asnjë mandat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
