.png)
Kryeministri Edi Rama thotë se beteja ligjore me investitorin italian, Francesco Becchetti nuk ka përfunduar, duke hedhur poshtë lajmin e publikuar nga Zëri i Amerikës, ku thuhet se Shqipëria ka humbur përfundimisht gjyqin për 110 mln eurot që pretendon italiani.
Përmes dy postimeve të njëpasnjëshme në Twitter, kreu i Qeverisë akuzon Presidentin dhe opozitën se po i gëzohen parakohe këtij lajmi.
“Gëzimi sharlatanesk i Presidentit mendjehumbur dhe i partisë që për pushtet po infekton përditë shqiptarët, do të zgjasë pak dhe ata do të humbasin, jo Shqipëria, e cila siç po fiton mbi Armikun e Padukshëm, do të fitojë edhe mbi Marifetçiun e Paskrupullt”, shkruan ai.
Rama thotë se Shqipëria ka fituar 3 nga katër gjyqet ndaj Becchetti-it, duke kujtuar se ky i fundit është i kërkuar nga drejtësia shqiptare.
“Gëzimi i Ilir Metës dhe i Lulepartisë për vendimin e padrejtë të arbitrazhit në favor të një individi që kërkohet nga drejtësia shqiptare është sa i neveritshëm, aq dhe i parakohshëm! Shqipëria ka fituar tre nga katër gjyqet ndërkombëtare ndaj këtij marifetçiu dhe beteja vazhdon!”, shkruan ai në postimin e dytë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
