Kampioni olimpik, Yohan Blake, tha se është i gatshëm të mos marrë pjesë në Lojërat Olimpike të Tokios për të mos marrë vaksinën kundër koronavirusit, edhe pse ky nuk është një detyrim nga organizatorët e kompeticionit.
“Mendoj vetëm që të ruaj forcën, nuk dua të bëj vaksinën, më mirë mungoj në Olimpiadë se sa të marr vaksinën, nuk e marr”, tha xhamajkani në një intervistë për gazetën vendase “The Gleaner”. “Nuk dua të merrem me këtë çështje tani, por kam arsyet e mia”.
Blake, dikur rival i legjendës së atletikës, Usain Bolt, me siguri që do të ketë mundësi të marrë pjesë në Tokio 2021, që do të jetë edhe olimpiada e fundit për të. Komiteti Olimpik Ndërkombëtar ka thënë deri tani se marrja e vaksinës kundër koronavirusit është “e inkurajueshme”, por jo e detyrueshme për sportistët pjesëmarrës.
“Ndiq mendjen tënde, jo turmën”, tha Blake, dy herë fitues i medaljes olimpike të artë, në një video të postuar të shtunën në Twitter. “Njëkohësisht respekto mendimin e të tjerëve. Por mos lejo të tjerët të të marrin të drejtën e zgjedhjes”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
