Një ngjarje e rëndë ka tronditur futbollin argjentinas. Sulmuesi Santiago Garcia, 30 vjeç, i ka dhënë fund jetës në apartamentin e tij në Mendoza. Futbollisti uruguaian, që prej 2016-ës luante për Godoi Kruz, sipas mediave lokale, është vetëvrarë.
Trupin e tij e kanë gjetur forcat e rendit, që janë vënë në lëvizje pas alarmit të familjarëve të futbollistit, të cilët kishin tentuar pa fund ta kontaktonin në tri ditët e fundit. Kur hynë me forcë në banesë, policët e gjetën Garcian të shtrirë në dysheme. Autoritetet lokale nuk kanë dalë ende me një njoftim zyrtar për vdekjen e futbollistit, por kanë bërë me dije se kanë gjetur një armë zjarri pranë trupit të tij të pajetë.
Sulmuesi uruguaian vuante prej kohësh nga depresioni dhe për këtë arsye kishte marrë pak kohë pushim për një trajtim te psikiatri. Ndeshja e fundit e Garcias daton më 19 dhjetor të vitit të kaluar. Ai ishte formuar si futbollist te të rinjtë e Nacional Montevideos. Kishte luajtur për Atletiko Paranaense, Kasimpasha dhe River Plejtin.
Garcia ishte duke e ndërprerë kontratën me Godoi Kruz, por agjenti i tij, Daniel Fonseka, ish-lojtar i Napolit, kishte në tavolinë ofertat e disa klubeve të tjera argjentinase.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
