Pas humbjes 4-1 ndaj Partizanit, trajneri Skënder Gega ka marrë përsipër përgjegjësitë dhe i ka paraqitur dorëheqjen klubit verilindor. Lajmi është bërë i ditur nga Kukësi në faqen zyrtare, ku publikohet edhe mesazhi i Gegës.
Presidenti i nderit të Kukësit Safet Gjici shprehu keqardhje për dorëheqjen e trajnerit Skënder Gega nga stoli i verilindorëve. Megjithatë, ai nuk e mbylli përfundimisht derën Gegës duke thënë se mund ta mirëpresë në të ardhmen. Gjici shtoi se Rrahman Hallaçi do të jetë trajner i komanduar i Kukësit dhe nëse siguron rezultate pozitive mund të emërohet në stolin verilindor. “Mendoj se ishte e nxituar pak. Ne nuk jemi as në mes as në fund të renditjes. Nuk është vetëm faji i tij, por i lojtarëve. Gega mund të jetë tek Kukësi në të ardhmen, sepse ne kemi rikthyer disa trajnerë. I kishte thënë më para drejtorit dhe lojtarëve para se të më thoshte mua sepse nuk kam ato rezultate që duhen. E vlerësoj dorëheqjen. Hallaçi do të vazhdojë, por do ta shohim gjatë rrugës. Është e vështirë të gjesh trajnerë si duhet. Hallaçit i eci mirë kur s’ishte Gega. Nëse do ketë rezultate, nuk do bëjmë shumë ndryshime”.
Në tre ndeshjet që Gega nuk ishte në pankinë Kukësi mori 7 pikë, dy fitore e një barazim. Gega e mori drejtimin e Kukësit në verë, por aventura e tij është mbyllur pa u mbyllur viti 2020.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
