Ndërkohë që bojkoti vijon të jetë një temë e hapur në një kohë kur palët, i qëndrojnë strikt qëndrimit të tyre Liga Profesioniste e Futbollit ka dalë me njoftimin se po kërkon një sponsor gjeneral për sezonin e ri të Kampionatit Shqiptar “Kategoria Superiore”, që ende nuk ka nisur. Sponsori Gjeneral përfiton ndër të tjera të drejtën e emrit të Kategorisë Superiore (Superligës) dhe shumë përfitime të tjera të cilat janë pjesë e një pakete të kompletuar sponsorizimi.
Në njoftimin e bëra nga Liga thuhet se çdo kompani e interesuar duhet të jetë një kompani që gëzon emër të mirë dhe reputacion të rëndësishëm kombëtar dhe/ose ndërkombëtar. Shitja e të drejtave të emrit do të ketë afat vetëm për sezonin 2020-2021, me një çmim dysheme prej 10 milionë lekë.
Liga në mbledhjen e fundit vendosi që bojkoti të vazhdojë. Pas takimit, presidenti i Ligës Profesioniste, Edvin Libohova, theksoi se bojkoti do vazhdojë deri në realizimin e kërkesave nga qeveria. “Pas diskutimeve në mbledhje u vendos që të vazhdojmë bojkotin derisa të zgjidhen kërkesat. Është një vendim unanim i Ligës. Jemi në pritje të një takimi me qeverinë për kërkesat tona”, – theksoi Libohova. Këtë fundjavë ishte menduar se do të fillonin aktivitetet, por ndoshta duhet pritur ende, të paktën për Superioren. Liga Profesioniste dhe drejtuesit e klubeve elitare kërkojnë me ngulm që qeveria të plotësojë kërkesat e tyre, ndaj dhe nuk tërhiqen në vendimin e tyre për bojkot të kampionatit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
