Kanë mbetur edhe 90 minuta nga mbyllja e kampionatit dhe tashmë është zgjidhur edhe dilema e skuadrës që do të shkojë në “Play out”. Është Vllaznia, që për të qenë në Superiore edhe sezonin e ardhshëm, duhet të luajë një ndeshje shtesë në fushën e saj me fituesin e çiftit Besëlidhja-Pogradeci, dy kundërshtarë nga Kategoria e Parë.
Partizani nuk ka toleruar aspak në “Air Albania Stadium”, ku e ka mposhtur 3-0 Vllazninë. Për të kuqtë, të cilët gjejnë fitoren pas tre barazimeve radhazi, shënuan Solomon, Kordeiro dhe Mala. Asgjë për t’u mbajtur mend nga skuadra shkodrane, së cilës tashmë i janë shfaqur makthet e rënies në të Parën. Bylisi, rivali i Vllaznisë, mundi pastër Luftëtarin 2-0, duke krijuar distancën e 5 pikëve një javë para fundit, kështu që është i paarritshëm.
Tirana, ashtu siç mund të ishte menduar, është thyer në Laç, ku ekip vendës lufton fort për një vend në Kupat e Europës. Kampionët e rinj të Shqipërisë u mundën 3-1 në këtë transfertë të fundit të sezonit. Golin e nderit për ta e shënoi Torasa në minutën e fundit, kurse për Laçin shënuan Nuabueze dy herë dhe Xhixha. Teutra fitoi 2-3 në Vlorë ndaj Flamurtarit, që shpërdoroi një penallti, kur rezultati ishte 2-2.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
