PSG kërkon të blejë përfundimisht Mauro Ikardin, ndërsa Interi do Edinson Kavanin. Përballë rrezikut të humbjes së golave dhe talentit të Lautaro Martinez, të cilin Barcelona e kërkon me çdo kusht, klubi zikaltër dëshiron t’ia besojë sulmin uruguaianit, në skadencë kontrate me parisienët.
Për ta bindur Kavanin të veshë fanellën e tretë italiane, pas atyre të Palermos dhe Napolit, Interi ka gati një kontratë trevjeçare prej 7.5 milionë eurosh, plus bonuset. Interit mund t’i prishë punë trajneri Diego Simeone, i cili e kërkon me ngulm tek Atletiko Madrid. Vlerësimi i Simeones për lojtarin 33-vjeçar duhet prej kohësh, ndërkohë që orët e fundit ka dalë në skenë edhe pista e Njukasëllit, tashmë me pronarë arabë.
Kavani mund të qëndronte në Paris edhe një sezon, por klubi nuk ka në plan t’ia rinovojë kontratën. Fati i uruguaianit, “bomberi” më i mirë i historisë së PSG-së, është i lidhur ngushtë me atë të Mauro Ikardit. PSG kërkon të blejë kartonin e ish-kapitenit të Interit, por pret një ulje çmimi nga zikaltrit. Këta të fundit kanë edhe një problem tjetër sa i takon afrimit të Kavanit. Edhe pse ai ka shënuar 304 gola, tifozët nuk janë entuziastë, sepse i druhen faktit se mund të ndodhë si me Aleksis Sançez, që po dështon.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.