Për Amerikën kanë qenë të tmerrshme 24 orët e fundit. Nga koronavirusi kanë humbur jetën 2100 persona, numri më i lartë i regjistruar deri tani në këtë vend. Janë regjistruar 35.098 raste të reja të personave të infektuar nga Covid-19.
Sipas të dhënave të shpërndara nga Johns Hopkins University, rastet e të infektuarve në total në Amerikë janë 496.535, 170 mijë nga të cilët vetëm në shtetin e Nju Jorkut. Deri tani kanë humbur jetën në Amerikë 18.586 persona dhe trendi i ditëve të fundit është shumë i frikshëm. Numri i të infektuarve nga koronavirusi në gjithë botën ndërkohë ka shkuar në 1.7 milionë.
Rekord të infektuarish ka pasur orët e fundit edhe në Japoni. Është dita e katërt radhazi që numri i të infektuarve po rritet ndjeshëm në këtë vend. Gjatë 24 orëve të fundit, rastet e reja në Japoni janë 658, duke e çuar numrin në total në 6.717, ndërsa numri i viktimave që nga fillimi i pandemisë është 105.
Në Kinë, nga ku nisi kjo pandemi e tmerrshme, janë regjistruar 46 raste të reja, 42 nga të cilët të ‘importuar’ nga jashtë. Kanë humbur jetën 3 persona, duke e çuar totalin e viktimave në 3.339.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
