Diego Armando Maradona është shumë pranë stolit të kombëtares së Venezuelës. Pas largimit të Dudamel nga drejtimi i kësaj skuadre, “El Pibe de Oro” shihet si favorit për të marrë vendin e tij.
Maradona drejton aktualisht Gimnasia La Plata në Argjentinë, por nuk është paraqitur në grumbullimin e ekipit për nisjen e stërvitjes pas festive të fundvitit. Sipas asaj që shkruan shtypi sportiv argjentinas, mungesa e Maradonës ka të bëjë pikërisht me faktin se ai është në bisedime për të marrë drejtimin e Venezuelës, pavarësisht se është justifikuar me disa kontrolle mjekësore.
Argjentinasi i famshëm ka qenë gjithmonë i lidhur me ambientin venezuelian, ku ka dalë hapur në krah të presidentit Nikolas Maduro në më shumë se një rast. Maradona është një mik i ngushtë i tij dhe kjo është një arsye shumë e fortë që të ketë një marrëveshje për drejtimin e kombëtares venezueliane të futbollit. Në nëntor Maradona dha dorëheqjen nga drejtimi i Gimnasias, por më pas në klub ndodhën ndryshime të tjera, u ndërrua presidenca dhe me ndërhyrjen e tifozëve, ai u kthye sërish në stol pas disa ditësh.
Mbetet për t’u parë si do të rrjedhin ngjarjet, pasi nuk përjashtohet ndonjë surprizë e minutave të fundit. Maradona është krejtësisht i paparashikueshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
