Kryeministri Edi Rama ka zhvilluar sot një takim urgjent me ndërtuesit në Durrës, ku i paralajmëroi ose të rregullojnë pallatet që kanë në përgjegjësinë e tyre ose do të futen në burg.
“Ky është vendimi i popullit, ata ndërtues që i janë shembur ndërtesat e bëra prej tyre do të shkojnë në burg, në rast se kemi të bëjmë me një dëm sipërfaqësor të gjithë juve ju takon ta riparoni dëmet duke pasur parasysh standardet teknike”, deklaroi kreu i qeverisë. “Muret do të riparohen tërësisht. Nëse nuk e bëni vet, do të thotë që do i bini në qafë tasksapaguesit, që do i bëni dëm shtetit. Unë nuk dua t’ia di fare si është situata e juaj ekonomike sot, më mirë ndërtoni ato që janë në përgjegjësinë tuaj se sa i humbni edhe ato që keni”, u shpreh ai.
Rama tha se ndërtuesit duhet të nisin urgjent punë, të ngrenë kantierët, pasi përndryshe ndaj tyre do të ketë masa të ashpra.
“Po i bie shumë shkurt, se s’dua të bëj filma. Që nesër bashkia do jetë në dispozicionin tuaj, gati për të nisur punë. Ngrini menjëherë kantierët. Ne do vëmë njerëz mbi kokë, ju jeni në rregull. Kush tërhiqet nga kjo punë, do të jem unë dëshmitar. Ua keni detyrim popullit, ua keni për detyrë fëmijëve tuaj t’ua lini emrin pa njollë”, tha Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
