Prestigjiozja italiane “La Gazzetta dello Sport” i ka kushtuar një artikull transformimit të futbollistit të Kombëtares së Shqipërisë, Emanuele Ndoj. Në këtë artikull flitet me superlativa për mesfushorin kuqezi, që po rritet bashkë me Breshian dhe që është i destinuar të bëhet një lojtar i madh. Ndoj është një pikë referimi për trajnerin Korini, pasi është efikas në lojë, me asiste dhe gola. Ja artikulli i plotë për Emanuele Ndojin:
I lindur në Katania dhe i rritur në Padova, më pas në Romë. Tani ai është një pikë kyçe te Breshia dhe te Shqipëria. Emanuele Ndoj është simboli perfekt i integrimit. Lidhja me origjinën nuk është në kontrast me vendin ku jeton. Zgjedhja e tij, e ngjashme me atë të Gigs apo Boateng, nuk e veçon nga i njëjti cikël futbollistik me atë të Bizolit dhe Tonalit. Ndoj është aktualisht një nga lojtarët më të vlerësuar të Serisë B.
Nuk është vetëm goli i shënuar të martën që shkoi pikërisht ndaj Padovas, ish-skuadrës së tij, - me një trajektore alla Del Piero, - që e evidenton këtë mesfushor shtatlartë, tashmë mjaft elegant në lojë dhe me gjuajtje potente. Pjekuria e Ndojit ka ecur paralel me rritjen e skuadrës në këto muaj të fundit, ku ajo po kryeson renditjen. Ashtu si Bizoli dhe Tonali, Ndoj është besnik i Breshias nga sezoni i kaluar. Te kjo skuadër e ka sjellë Sagramola, administratori i deleguar i pronarëve të vjetër. E ka mbajtur pa hezituar edhe Çelino, presidenti aktual, ndërsa trajneri Korini ka besuar shumë te shqiptari. E kishte kërkuar Spali më parë, por Ndoj kaloi te Breshia nga Roma, bashkë me Mikele Somën. Kartoni i të dyve shkonte në 150 mijë euro dhe ata u shkëmbyen me Ismail H’Maidat (tashmë i zhdukur nga futbolli).
Këtë vit Ndoj ka qenë vendimtar në barazimin ndaj Padovas, ndërsa në 26 dhjetor të vitit të kaluar i dha fitoren Breshias me atë gol në sekondat e fundit të ndeshjen me Kremonezen, që u mbyll 3-2. Ka shënuar po ashtu edhe në fitoren 3-1 ndaj Karpit. Duket një lojtar i destinuar për të bërë karrierë, edhe pse në fillim për të kishte dyshime. Askush nuk dyshonte në talentin e tij, por sjellja në fushë ishte inferiore në raport me potencialin e tij. I ëmbël me topin, por i mungonin golat dhe asistet, dinte të driblonte, por nuk arrinte të kalonte kundërshtarin. Elegant, por pak i ngathët. Ndërhyrjet me vonesë dhe sjellja e gabuar i kushtonin kartonë dhe vërshëllima në shkallët e stadiumit nga një publik që shihte një Breshia gjithmonë në “fije të perit”, duke shpëtuar javën e fundit të kampionatit për sezone me radhë.
Tani gjithçka është ndryshe. Ndoj është transformuar, ashtu si dhe Breshia që komandon renditjen dhe po i afrohet Serisë A. Kontroll topi i mirë, asiste dhe gola. Vendimtar në ndërhyrje dhe më pak kartonë, që e kanë bërë ndër beniaminët e tifozëve të Breshias. Korini nuk e kursen kurrë dhe paraqitja e tij është super. Ndoj është çliruar dhe i ka bërë të gjithë për vete. De Biazi donte ta merrte te Shqipëria, por nuk ia doli në kohë dhe këtë gjë e ka bërë tashmë Panuçi. Ndoj vendosi të luajë për Shqipërinë, jo për Italinë, ku kushedi çfarë do të kishte bërë bashkë me Tonali…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.