.png)
Rreth 40 organizata ndërkombëtare i kanë dërguar një letër autoriteteve të Mbretërisë së Bashkuar, ku kërkojnë që të Shqipëria të hiqet nga lista e ‘vendeve të sigurta’, pasi sipas tyre, Shqipëria ka probleme që i bëjnë njerëzit të kërkojnë azil.
Në letër renditen disa nga problematikat si korrupsioni, trafiku i qenieve njerëzore, bandat, apo diskriminimi i komunitetit të LGBTQI, romëve dhe egjiptianëve.
“Ne dëshirojmë të tërheqim vëmendjen tuaj për Amendamentin 128A dhe për të kërkuar mbështetjen tuaj të paçmuar në adresimin e një çështjeje kritike brenda Projektligjit aktual të emigracionit ilegal. Ky projektligj, siç është, e klasifikon Shqipërinë në një listë të ‘vendeve të sigurta’, qytetarët e të cilës mund të kthehen shpejt në atdhe, pavarësisht nga kërkesat e tyre për azil apo të drejtat e njeriut.
Sipas mendimit tonë, përfshirja e Shqipërisë në një listë të tillë të ‘vendeve të sigurta’ është një vendim i gabuar. Shqipëria nuk i përket BE-së (Nuk është anëtarësuar) dhe as nuk i plotëson ato standardet e nevojshme për t’u klasifikuar si një “vend i sigurt”.
UNHCR-ja (Komisioneri për të drejtat e emigrantëve) ka shprehur shqetësimet e veta, duke deklaruar se “UNHCR është e shqetësuar që lista përfshin Shqipërinë, pavarësisht vendimeve të gjykatave të MB të cilat pranojnë se grupe të caktuara shtetasish shqiptarë mund të jenë në rrezik të persekutimit”.
Përcaktimi i një shteti si ‘vend i sigurt’ kërkon konfirmimin se “në përgjithësi në atë shtet nuk ka rrezik serioz të persekutimit të shtetasve të atij shteti.”
Fatkeqësisht, Shqipëria nuk e plotëson këtë kriter. Vendi përballet me çështje të rënda si korrupsioni, trafikimi i qenieve njerëzore, dhuna e lidhur me bandat dhe diskriminimi ndaj komuniteteve duke përfshirë komunitetet LGBTQI, rome dhe egjiptiane. Shkalla e pranimit të kërkesave për azil nga shtetasit shqiptarë në MB e vërteton më tej këtë pohimi se Shqipëria nuk përmbush standardin e ‘vendit të sigurt’. Në vitin 2022, Mbretëria e Bashkuar u dha statusin e mbrojtjes më shumë se 650 shtetasve shqiptarë, përfshirë këtu mbi 60 fëmijë të pashoqëruar. Për më tepër, i njëjti vit dëshmoi një shkallë suksesi prej 57% për ankesat e bëra nga shqiptarët në gjykatën e nivelit të parë për kërkesat e tyre për azil. Ata që ofrojnë shërbime mbështetëse profesionale për azilkërkuesit shqiptarë dhe viktimat e trafikimit dëshmojnë drejtpërdrejt frikën dhe vuajtjen e komunitetit azilkërkues shqiptar. Këta individë, të cilët janë jashtëzakonisht të cenueshëm, shpesh mbeten të panjohur si të tillë nga shoqëria në përgjithësi. Pohimi se Shqipëria është një ‘shtet i sigurt’ për shtetasit e saj është, në përvojën tonë, thelbësisht i gabuar. Do të ishte një keqinterpretim të këmbëngulësh se nuk ka rrezik persekutimi për shtetasit në atë shtet. Ne rrezikojmë të shkelim drejtpërdrejt detyrimet tona ligjore ndërkombëtare dhe të brendshme duke kthyer me forcë individët për t’u përballur me persekutimin. Ne, të nënshkruarit, qëndrojmë me vendosmëri në mbështetje të këtij amendamenti për të hequr Shqipërinë nga lista e ‘vendeve të sigurta’.
I lutemi deputetëve të marrin në konsideratë rëndësinë e kësaj çështjeje, të reflektojnë mbi narrativat personale dhe të dhënat faktike të ofruara dhe të përputhen me qëndrimin tonë në mbrojtjen e të drejtave themelore të njeriut të shtetasve shqiptarë. Ne kërkojmë që të përdorni ndikimin tuaj për të parandaluar që individët vulnerabël të rikthehen për t’u përballur me persekutimin, duke refuzuar klasifikimin e Shqipërisë si një ‘vend i sigurt’ brenda projektligjit aktual të emigracionit të paligjshëm”, shkruhet në letër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
