.png)
Shqiptarët festojnë 113-vjetorin e alfabetit të gjuhës shqipe dhe mes personave që kanë uruar në këtë datë është edhe Kryeministri i Maqedonisë së Veriut, Zoran Zaev.
“Këto janë vlerat tona, që janë vlera europiane dhe me të cilat ne po ecim përpara në rrugën e integrimit në BE. Kremtimi i vlerave kulturoreve, ngjarjeve dhe traditave të të gjitha bashkësive etnike, përfshirë ato shqiptare është themeli i shoqërisë sonë multikulturore. Është një kontribut i fuqishëm për një të ardhme të begatë dhe për mirëqenien e të gjithë qytetarëve”, shkruan Zaev përmes një postimi në rrjetet sociale.
Alfabeti i gjuhës shqipe u vendos në Kongresin e Manastirit, sot në Maqedoninë e Veriut. Kongresi nisi punimet më 14 nëntor të 1908-s dhe i përmbylli ato më 22 nëntor të po atij viti.
Në këtë Kongres u thirrën 50 delegatë, përfaqësues të 23 qyteteve të banuara nga shqiptarët, përfaqësues të shoqërive kulturore e patriotike. Nga këta delegatë 32 patën të drejtë vote dhe 18 ishin me statusin e vëzhguesit.
Ndër delegatët më të shquar qenë Gjergj Fishta, Mithat Frashëri, Sotir Peci, Ndre Mjeda, Shahin Kolonja, Bajo Topulli, Parashqevi Qiriazi e Fehmi Zavalani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
