Gazeta Si – Milani nuk mungon në apel. Kuqezinjtë u janë përgjigjur fitoreve të Napolit, Interit dhe Juventusit, duke mundur 0-2 Bolonjën në ‘Dall Ara’, falë golave të Zhiru dhe Pulisiç.
Në ndeshjen e fundit të javës së parë të Serisë A, skuadra e Piolit tregoi forcë dhe personalitet. Bolonja goditi traversën vetëm pas 20 sekondash, më pas fjalën e morën Pulisiç dhe Zhiru. Francezi zhbllokoi ndeshjen pas një asisti të Reijnders, më pas shërbeu për amerikanin që shënoi golin e dytë. Në minutën e fundit Leao goditi shtyllën.
Pushimin e ndeshjes Milani u detyrua ta bënte në fushë. Në dhomën e zhveshjes së stadiumit nuk kishte ajër të kondicionuar për shkak të një problemi teknik dhe lojtarët dhe trajneri Pioli qëndruan në fushën e blertë, në pritje të pjesës së dytë.
Duhet theksuar se në fraksionin e dytë të ndeshjes u ndje lodhja, pasi edhe vapa bëri të vetën. Gjithsesi, Milani ka marrë 3 pikët e para në një fushë të vështirë, duke treguar se mund të rivalizojë për titullin kampion.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.