.png)
Garda bregdetare e Suedisë ka identifikuar rrjedhjen e katërt të gazit në Detin Baltik, ka thënë një zyrtar i këtij shteti sot, më 29 shtator.
Në këtë det kalojnë tubacionet e gazsjellësit Nord Stream, i cili çon gazin natyror nga Rusia në Gjermani.
Tri rrjedhje – dy në zonën e Danimarkës dhe një në zonën e Suedisë – janë zbuluar këtë javë në dy tubacione të mëdha ruse, Nord Stream dhe Nord Stream 2.
NATO-ja dhe Bashkimi Europian kanë thënë se rrjedhjet janë akt “sabotazhi” dhe janë zotuar se do të marrin masa për të mbrojtur infrastrukturën kritike europiane.
“Janë dy rrjedhje në anën suedeze dhe dy në anën daneze”, ka thënë një zyrtar i Gardës kufitare për mediat të enjten.
Asnjëri tubacion nuk ka qenë duke u përdorur në kohën e shpërthimeve të dyshuara, mirëpo ato kanë qenë të mbushura me gazin që është duke u derdhur në Detin Baltik prej 26 shtatorit - kur janë identifikuar rastet e para.
Sizmologët nga Suedia dhe Danimarka kanë thënë se kanë regjistruar shpërthime të fuqishme në këtë zona të rrjedhjeve. Këto njoftime kanë shtyrë policinë në Suedi që të nisë hetime për mundësinë e sabotazhit.
Rrjedhja e katërt është identifikuar në gazsjellësin Nord Stream 2, i cili gjendet në afërsi të Rrjedhës Veriore, kanë thënë zyrtarët.
Incidenti ka nxitur rritjen e çmimeve të gazit natyror në Europë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
