Ministrja e Mbrojtjes, Olta Xhaçka në një konferencë për median ka bërë të ditur se numri i viktimave të shkaktuar nga tërmeti ka arritur në shtatë.
“Deri tani janë 135 të lënduar dhe 12 shtrime në spitalin e Durrësit, 60 në QSUT dhe rastet janë duke u shtuar. Janë konfirmuar 7 jetë të humbura, 3 në Durrës, një në Lezhë e një në Kurbin. Operacionet vazhdojnë. Jemi pranë me mendje dhe me zemër të afërmve dhe familjarëve të tyre. Jemi ende duke mbledhur raportime nga çdo qark, por është e pamundur të llogariten dëmet tani. Kurajo të gjithëve. I gjithë shteti është në këmbë", theksoi Xhaçka.
Më tej ajo theksoi se forcat zjarrfikëse dhe ekipet e shpëtimit janë nisur drejt Durrësit dhe Thumanës. Janë 400 efektivë të FA në terren, por të gjithë janë në gjendje gatishmërie.
"Është një situatë e rëndë, qoftë për shkak të godinave të dëmtuara qoftë për shtrirjen gjeografike. Evitoni qëndrimin nga shtëpi e dëmtuara. E rëndësishme është që shtëpitë të evidentohen", tha Xhaçka. Ministrja tha se mësimi është pezulluar sot dhe do të vazhdojë edhe nesër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.